Овие денови се зборува за историскиот триумф на нашите најдобри фудбалери против четирикратниот светски шампион Германија. А освен во Македонија, оваа изненадувачка победа одекна и пошироко, а дури и е направен цртан филм за овој успех на „рисовите“.

Веб порталот „Just Cartoon“ се погрижи секако да ги има сите најважни моменти кои се случија на дуелот во Дуизбург. Почнува со водството пред крајот на првото полувреме, двајца германски репрезентации расправаат кој кого да чува, една убава топка дојде до Барди кој правовремено асистираше до Пандев.

Следува лизгачкиот старт на Алиоски врз Сане, а сигурен од белата точка беше Гундоган. Требаше да има пенал и за нас, реагираа нашите играчи до рускиот судија кој не виде допир со рака на Џан во казнетиот простор.

А секако германскиот фудбалер се однесува како ништо да не се случило, и во овој анимиран клип ја скри раката. Не може да помине без неверојатното промашување на ѕвездата на Челси, Вернер, ситуација која можеби ќе го сменеше резултатски мечот.

И на крај решавачкиот момент во финишот, Адеми убаво со дриблинг се ослободи од Ридигер, додаде до Елмас кој го постави конечниот епилог. И на крајот „се слави“ Вернер кој да повториме имаше неверојатна утка. Македонците слават „фиќо“ во овој цртан филм, од друга страна немоќен Јоаким Лев и распаднатиот германски тенк.