Во тешка несреќа со огномет, која се случила за време прославата на Нова година во Хонолулу во американската држава Хаваи, загинале тројца луѓе, а над 20 се повредени, јави „Си-би-ес њуз“.

Ракетите биле поставени на маса која се превртела, па проектилите испукале кон други ракети, кои потоа верижно експлодирале, соопшти полицијата.

На самото место загинале две жени, а уште една починала во болница. Повеќе од 20 луѓе, меѓу кои и деца, биле пренесени во болница со тешки изгореници и повреди од експлозиите. Неколкумина од повредените се наоѓаат во критична состојба.

На социјалните мрежи е објавена снимка од дрон на која се забележани серијата експлозии.

BREAKING: At least 2 people killed, 22 injured after fireworks explosion in Honolulu, Hawaii pic.twitter.com/RW2SDSP3QM

— BNO News (@BNONews) January 1, 2025

Гувернерот на Хаваи, Џош Грин, укажа на потенцијалната опасност од огнометите, споредувајќи ги последиците од несреќата со оние од воените зони.

Според американските медиуми, првиот кат од куќата каде што се случил инцидентот е значително оштетен, а од експлозиите настрадале и прозорците на куќите на спротивната страна од улицата. Според надлежните, имало луѓе во близина кои продолжиле да палат огномети додека жртвите од експлозиите биле носени во болница.

„Работам во брза помош повеќе од 30 години, и ова веројатно е еден од најтешките случаи со кои сум се соочил, имајќи ја предвид големата трагедија, бројот на пациенти и сериозноста на повредите,“ изјави д-р Џим Ајрленд, директор на Одделот за итна помош во Хонолулу.