Шпанската полиција пронашла голема количина препарирани животни, во рамките на неколкумесечна истрага за шверц. Тоа е една од најголемите вакви заплени во Европа, јавува „Би-би-си“.

Повеќе од 1.000 препарирани животни, меѓу кои носорози, поларни мечки и слонови, лавови, леопарди и гепарди, се пронајдени во огромно складиште од 50.000 квадратни метри во близина на Валенсија. Меѓу нив има повеќе од 400 заштитени видови, од кои некои се загрозени, како што се бенгалскиот тигар или рисот, како и исчезнати видови.

Сопственикот на магацинот не е уапсен, но е под истрага за криумчарење и кривични дела против растителниот и животинскиот свет, соопшти полицијата.

Истражителите проценуваат дека вредноста на препарираните животни е 29 милиони евра.