Дваесет и тригодишната Ламија од јужниот бангладешки град Барисал родила петорка по природен пат, што е мошне редок случај. Веста за исклучителниот среќен настан ја потврдија лекарите од болницата за дијабетес и општа медицина „Адвокат Хемајет Удин Ахмед“, каде што се случило породувањето, објави BHS. news.

Според изјавите на медицинскиот персонал, раѓањето на тројки било очекувано, но за време на породувањето, на изненадување и на родителите и на лекарите, се родиле пет бебиња.

Такво природно породување на петорка е исклучително ретко во медицинската пракса.

Ламија и нејзиниот сопруг Сохел четири години се обидувале да добијат дете, а веста за доаѓањето на пет бебиња е остварување на нивниот голем сон да имаат многу деца.

Претставниците на болницата изјавија дека и мајката и новороденчињата моментно се во стабилна состојба, но се под строг медицински надзор во повеќе здравствени установи во Бангладеш за да се обезбеди целосна грижа и следење.