ВБЦ светскиот шампион во тешка категорија, британскиот боксер Тајсон Фјури, го победи поранешниот борец на УФЦ, Френсис Нгану со поделена одлука на судиите во борбата без титула во Саудиска Арабија, во која малку недостасуваше да дојде до големо изненадување.

Фјури, непоразениот носител на еден од најпрестижните појаси во боксот, за влакно го избегна првиот пораз против 37-годишниот противник кој никогаш претходно не боксувал професионално.

Камерунецот Нгану го испрати Британецот на подот во третата рунда со лево кроше, а изненадувањето и шокот беа јасно видливи на лицето на 35-годишниот Фјури. Сепак, тој успеа да ја преживее рундата, а во останатиот дел од мечот не покажа речиси ништо.

– Тоа дефинитивно не беше во сценариото – рече Фјури откако двајцата судии му донесоа победа со 96-93 и 95-94. Третиот судија даде резултат 95-94 во корист на Нгану.

– Тој е пеколен борец и пеколно подобар боксер отколку што мислевме дека ќе биде. Тој е незгоден човек, добро удира и многу го почитувам. Ја имав една од моите најтешки борби во последните 10 години – се зборовите на Фјури.

Фјури рече дека нема клаузула за реванш, но би сакал повторно да се бори со Нгану по неприкосновената борба за обединување на титулите со украинскиот ИБФ, ИБО, ВБО и ВБА шампион, Олександр Усик, а двата шампиони рекоа дека тоа ќе биде на 23 декември. Усик, кој беше во Саудиска Арабија да го гледа својот иден противник, рече дека е подготвен.

Нгану се откажа од својата светска титула во тешка категорија по спорот за договорот со УФЦ и ја напушти асоцијацијата во јануари.

– Мојот тренинг траеше само три и пол месеци и во оваа борба влегов со повреда. Но, не сакам да се правдам. Ќе гледам што можам понатаму да направам за да ги подобрам перформансите за да се вратам уште подобро. Сега знам дека можам да го правам ова, подгответе се. „Предаторот“ е тука – рече Нгану.