Никој не сака кога ќе ја отвори вратата од фрижидерот да го дочека не баш пријатна комбинација на мириси, но може да биде изненадувачки тешко да го одржувате свеж и без мирис.

Дали некогаш сте го исчистиле садот за собирање течности и сте ги избришале сите полици, но сепак не сте успеале да се ослободите од непријатниот мирис од фрижидерот?

Обидете се да ставите нова ролна тоалетна хартија на задната страна од полиците на фрижидерот. Можеби звучи лудо, но впивачките својства на тоалетната хартија ќе помогнат да се апсорбираат мирисите, пренесува „Хаус диџест“ (House Digest).

Најчест извор на смрдеа е мало заборавено овошје, истурен сок или заборавен сад со остатоци од храна турнати на задниот дел од фрижидерот. Се разбира, мирисите можат да бидат предизвикани и од прекумерна влага и истекување на фреон или амонијак. Најпрво, проверете дали сте го исчистиле фрижидерот и сте решиле евентуални протекувања или можни проблеми со моторот. Откако ќе го направите тоа, еве како ставањето тоалетна хартија во фрижидер може да ги елиминира непријатните мириси.

Тоалетната хартија многу добро впива, па ќе биде одлична во отстранувањето на вишокот на влага, која често се собира во фрижидерот. Само ставете чиста, тукушто извадена ролна на полиците. Овој метод е особено корисен за луѓето кои имаат многу овошје и зеленчук.

Чувањето на овошјето и зеленчукот на полиците не е многу добра идеја од неколку причини. Како прво, фрижидерот многу брзо се валка. А преостанатата храна може да се расипе и контаминира други производи. Второ, овошјето и зеленчукот што лежат на влажна површина може да почнат да гнијат.

Решението е едноставно. Доволно е под нив да ставите тоалетна хартија. Доколку производите не ги ставите директно во фрижидер, туку на хартија, секоја контаминација ќе заврши на неа. Наместо да го миете целиот фрижидер, само заменете ја хартијата со нова. Материјалот ја апсорбира и влагата за да не се акумулира на храната. Едноставно, но ефективно.

Исто така, подобро е да набавите тоалетна хартија без мирис. Откако ќе ја оставите тоалетната хартија да апсорбира мириси неколку дена, треба да ја замените старата со нова ролна.

Секако, тоа не значи дека фрижидерот не треба темелно да се исчисти барем еднаш месечно. За тоа, најдобро е да се користи топла вода со малку оцет и средство за миење садови.