Во првото коло од групата „А“ во Лигата на шампионите екипата на Наполи убедливо со 4:1 го совлада ланскиот финалист Ливерпул.

Одлична партија за „наполитанците“ имаше Зиелински кој постигна два гола и запиша две асистенции, а по еден погодок имаа Ангиса и Симеоне. Во листата на стрелците можеше да се запише и Осимен, но Нигериецот не беше прецизен од пенал во 18 минута.

За домаќините настапи и македонскиот репрезентативец Елиф Елмас од 74 минута како замена за Зиелински. На спротивната страна единствениот гол беше дело на Дијаз во 49 минута после асистенцијата на Робертсон.

Барселона на својот „Камп Ноу“ запиша висока победа од 5:1 против Плзен, „хет-трик“ за каталонскиот гигант запиша Левандовски, а по еден гол постигнаа Кесје и Торес. За Чесите во 44 минута стрелаше Сикора по додавањето на Јемелка.

Оваа вечер имаше уште едно дерби одиграно на „Џузепе Меаца“ во Милано каде Интер загуби од Баерн Минхен со 0:2. За германскиот првак првиот гол го постигна Сане во 25 минута, а автогол кај домаќините си постигна Д`Амброзио (66`).

Во другите натпревари од првото коло во ЛШ: Атлетико Мадрид – Порто 1:0, Клуб Бриж – Баер Леверкузен 1:0 и Тотенхем – Марсеј 2:0.