Крокодилот Хенри е долг импресивни 4,8 метри, тежи 700 килограми, а официјално е прогласен за најстар крокодил на светот. Деновите ги минува во зоолошката градина во Скотбург (Јужна Африка) со своите шест „сопруги“, а може да се пофали дека има 10.000 потомци.

Роден е во декември 1900 година во делтата на реката Окаванго во Боцвана, која е на листата на светско наследство на УНЕСКО, пишува „Тајмс нау њус“.

Таму пристигнал со лоша репутација, бидејќи наводно напаѓал луѓе, па на помош бил повикан познатиот ловец Хенри Нојман (по кого го добил името).

Опасниот предатор не бил убиен, туку завршил во заробеништво, а во последните 30 години престојува во Центарот за заштита во Скотбург.

Претставува атракција поради својот исклучителен изглед, големина и старост, додека посетителите му се восхитуваат од безбедно растојание.

Инаку, нилските крокодили живеат во Африка јужно од Сахара и во Мадагаскар. Тие се познати по тоа што напаѓаат луѓе. Иако на видот не му се заканува исчезнување, популациите во многу африкански земји се во опасност да исчезнат.