Откако пред пет дена во Скопје немаше победник (1:1), во возвратниот дуел одигран на стадионот Зумру во Кишињев најдобрата македонска женска фудбалска репрезентација славеше со 4:2 против Молдавија во рамките од групата 2 во Лигата Ц за пласман на Европското првенство 2025.

По првото полувреме нашите фудбалерки имаа позитива од 3:1, во втората минута автогол си постигна Бадичеану за водство на Македонија од 1:0.

Израмнија молдавските репрезентативки со погодокот на Табур во 22 минута, а само четири минути подоцна нашата предност ја врати Андонова од пенал. Непосредно пред паузата по асистенцијата на Максути, за 3:1 се погрижи Андреевска (43`).

Молдавките во 59 минута ја намалија својата негатива преку Колник, а конечниот епилог го постави Андонова со нејзиниот втор погодок на натпреварот.

На табелата Словенија е првопласирана со 12 бодови, пред Македонија која им седум, третопласирана е Летонија со три, а еден има Молдавија.

Следниот меч избраничките на селекторот Александар Андов ќе го имаат на домашен терен на 12 јули против летонската селекција.