Пред точно 30 години српскиот кошаркарски клуб Партизан предводен од тренерот Жељко Обрадовиќ успеа да ја освои титулата европски шампион. Во сезона исполнета со постојани (не)очекувани предизвици, сè запре во само една секунда.

На 16 април 1992 година за момент се чинеше дека сè е целосно изгубено, но тогаш Александар Саша Ѓорѓевиќ ја постигна една од најпознатите тројки во историјата на кошарката.

Белградските „црно-бели“ во финалето ја совладаа шпанската екипа на Хувентуд (71:70) во салата „Абди Ипекчи“ во Истанбул, Турција.

Најефикасен играч на таа средба беше сегашниот претседател на српската кошаркарска федерација, Предраг Даниловиќ со 25 поени.

Сезоната 1991/1992 ќе остане запаметена и по тоа што кошаркарите на Партизан само еднаш играа во Белград. Поради војната на територијата на поранешна Југославија, Партизан беше „домаќин“ во шпанскиот град Фуенлабрада, во близина на Мадрид.