Потпретседателот на Собранието и претседател на НСДП, Горан Мисовски во информативната програма на Слободен печат зборуваше за очекувањата од техничката влада и работата на новиот премиер Талат Џафери и новиот спикер на Собранието Јован Митрески, како и за очекувањата од претстојните избори.
Во однос на изборите и актуелниот рејтинг на партиите кажа дека анкетите во последните години и на последниот изборен циклус, се покажало дека не се баш точни, а според него, најточната анкета ќе се покаже на изборниот ден.

– Ако гледате секој изборен циклус наназад се појавува една огромна бројка кој одбива да се изјасни како ќе гласа и таа бројка изнесува помеѓу 40 и 50%. Ќе направам една мала илустрација. На локалните избори за Маврово и Ростуше сите анкети покажуваа дека ВМРО-ДПМНЕ води два спрема една во однос на коалицијата на СДСМ, ама изборниот ден и изборниот резултат е најдобрата анкета. Тогаш практично го прегазивме ВМРО-ДПМНЕ. Имам информации и знам дека СДСМ интензивно прави анкети и виз-а-ви анкетите што ги лиферува штабот на ВМРО-ДПМНЕ не е баш така како што тоа тие велат, изјави Мисовски.

Тој изрази уверување дека граѓаните ги препознаваат политиките на Владата и парламентарното мнозинство и дека тоа ќе се покаже на изборниот ден.

Што се однесува до коалициите за изборите кажа дека неговата НСДП останува во коалиција со СДСМ и најави убедлива победа на проевропскиот блок на следните парламентарни избори закажани за 8 мај.

– Во тој блок ќе учествуваат сите партии од сегашната владина коалиција, тоа ќе биде најголема предизборна коалиција од над 30 партии и тој сојуз убедливо ќе победи. Никогаш и никаде не се случило со ваков изборен модел, партија која е во коалиција со три или четири партии како што е ВМРО-ДПМНЕ, да победи коалиција која е составена од над 30 партии, посочи Мисовски.

Тој додаде дека претседателот на СДСМ, Димитар Ковачевски преговара со сите партии што го подрржуваат европскиот пат на Македонија наспроти коалицијата ВМРО-ДПМНЕ и Левица кои, според него, сакаат статус кво.

Говорејќи за односите во коалицијата, откри дека некогашниот коалициски партнер Павле Трајанов со демократскиот сојуза ја напуштил коалицијата само поради нерешени кадровски прашања.

– Тоа одговорно го тврдам и првпат го кажувам бидејќи постојано нѐ критикува, се повикува на некаква идеологија и политички одлуки но јас тврдам дека сето тоа е поради кадровски прашања. Нема да кажам кое е тоа прашање, едно и единствено беше, но присуствував на една средба каде што тоа беше ставено на маса, кога се одлучуваше дали парламентарното мнозинство ќе го поддржи францускиот предлог што подоцна стана предлог на сите 27 земји членки на ЕУ, изјави Мисовски.

Во однос на техничката влада и 100-те дена до избори, изрази убедување дека Талат џафери ќе биде одличен премиер, како што бил и како претседател на Собранието, а Јован Митрески, пак, ќе биде одличен спикер.

– Собранието функционира во полн капацитет, вчера добивме најмалку 10 закони од страна на Владата. Согласно правилата, новиот претседател се обрати до Владата и владата на седница заклучи дека останува зад подготвените закони и тие ќе бидат носени во соодветна собраниска процедура, кажа Мисовски.

Во однос на изборот за празното место на член на Државната изборна комисија, тој порача дека е потребно повеќе работа, а помалку пропаганда.

– Во соодветната комисија за тоа едно место во ДИК има два предлога од две опозициски парти и кога таа точка се отвори на Комисија тие две партии почнаа меѓу себе да си прават филибастеринг, а знаеме дека за гласање на член на ДИК треба да има двотретинско мнозинство. Да отпочнеме процес на консултации да го одбереме најдоброто решение и да го пополниме празното место во ДИК за да нема сомнежи дека изборниот процес ќе има некој сомнителен тек. Треба помалку пропаганда а повеќе работа меѓу пратеничките групи, порача Мисовски.