Премиерот и лидер на ВМРО-ДПМНЕ Христијан Мицкоски денеска се сретнал со Милош Вучевиќ, поранешен премиер на Србија и актуелен лидер на Српската напредна странка (СНС), партија од која доаѓа и српскиот претседател Александар Вучиќ и со која тој раководеше до пред некоја година.

Вучевиќ во јануари годинава беше принуден да поднесе оставка од премиерската функција по силниот притисок на јавноста во Србија, а неговото повлекување беше еден од условите кои ги поставија студентите на протестите за одговорност поради трагедијата со настрешницата на железничката станица во Нови Сад. Тој за средбата со Мицкоски објави видео на „Икс“ заедно со македонскиот премиер.

– Разговараме за тоа да ја подобриме и зајакнеме соработката меѓу ВМРО-ДПМНЕ и СНС и секако разговараме за српско-македонските односи и вкупните односи на Западен Балкан. Ќе го чуваме нашето пријателство почитувајќи ги двете држави и двата народа, помагајќи си и никогаш не работејќи едни против други – вели Вучевиќ.

Мицкоски пак се надева дека ваквите средби ќе станат традиција.

-Посетивме неколку културни места кои се духовно богатство на православниот свет. Се надевам дека од оваа посета Милош ќе понесе во Србија добри и квалитетни спомени. Ваквите средби можат само да значат добрососедски односи и подлабоко пријателство меѓу двете сестрински партии ВМРО-ДПМНЕ и СНС. Нека ни прерасне ова во традиција, може следната средба да ни биде во некој српски град – вели Мицкоски на видеото.

Дивно радно суботње поподне у Охриду pic.twitter.com/FaKdtCCOZw

— Милош Вучевић (@milos_vucevic) July 26, 2025