Македонската фудбалска А репрезентација вечерва на Националната арена „Тодор Проески“ во Скопје во својот трет натпревар од квалификациите за пласман на Светското првенство 2026 година одигра реми 1:1 против Белгија.

Силна офанзива на најдобрите белгиски фудбалери уште од самиот старт на натпреварот како што и се очекуваше, фаворитската улога беше на страната на избраниците на селекторот Руди Гарсија.

Успешно се бранеа нашите играчи, нападите на противникот одеа воглавно преку Доку, а во една опасна ситуација Лукаку се најде во идеална шанса, но неговиот удар успеавме да го блокираме.

Ние се обидувавме воглавно да се заканиме од контри, но и натаму не доаѓавме до првата посериозна шанса да го загрозиме белгискиот гол.

Полека се ослободувавме од силниот притисок иако и натаму често напаѓаше ривалот кој веќе имаше четири изведени корнери, а во 22 минута Салемакерс упати силен удар, но уште подобра интервенција имаше Димитриевски.

А само 120 секунди подоцна одбраната на Белгија киксираше, тоа веднаш сакаше да го искористи Барди кој шутираше, но одбрани белгискиот чувар на мрежата Селс.

Maxim De Cuyper | 🇲🇰 North Macedonia 0-1 Belgium 🇧🇪 pic.twitter.com/SwSvqwFKss

— JONERO♏♂️ (@JONERO10) June 6, 2025

Во 27 минута можеше да биде „златна“ за Македонија, Елмас одлично шутираше ја погоди стативата, одбиената топка дојде до Алиоски, но и тој ја погоди стативата.

Во следниот напад на Белгија следуваше казната, Лукаку чиј удар го одбранија нашите дефанзивци, топката дојде среќно до де Кујпер кој ја испрати топката во мрежата на Диимитриевски за водство на Белгија од 1:0.

Непосредно пред крајот на првото полувреме се изборивме за слободен удар, идеален за Барди, но шутираше право во „живиот ѕид“.

На стартот од вториот дел успеавме да постигнеме гол преку Елмас, но истиот беше поништен поради офсајд после интервенцијата од ВАР собата.

Нашата селекција играше многу подобро и поопасно кон голот на Белгија, Елмас во 54 минута имаше неколку добри дриблинзи, дојде до казнетиот простор на противникот, топката дојде до Костадинов, но овој лошо реагираше шутирајќи високо над голот на Селс.

Доку ни создаваше проблеми, во одредени моменти беше и пребрз за нашите дефанзивци, во 61 минута се најде в добра позиција да постигне гол, но Димитриевски ја отстрани опасноста за можно зголемување на позитивата на гостите.

Македонските фудбалери кои со сите сили се обидуваа да дојдат до погодок ја добиваа потребната поддршка од трибините каде имаше околу 25.000 илјади гледачи.

Во 70 минута белгиските репрезентативци можеа да ја зголемат својата предност, за наша среќа Раскин ја погоди левата статива. Одбиената топка дојде до Де Винтер кој шутираше, но топката заврши во рацете на Димитриевски.

🇲🇰 QUE GOLAÇO DO ALIOSKI!

O lateral esquerdo do Al Ahli foi pro ataque e meteu esse GOLAÇO pra empatar contra Bélgica no finalzinho.

pic.twitter.com/ioEQvUwAEM

— Central do Arabão (@centraldoarabao) June 6, 2025

Во 75 минута ВАР проверуваше за можен пенал за Македонија по падот на Барди кој се жалеше дека беше фаулиран во казнетиот простор на Белгија, но англискиот судија Кавана не покажа на белата точка.

Селекторот Милевски во 81 минута доби жолт картон поради приговор, а поради оваа опомена нема да ја води Македонија на гостувањето против Казахстан на 9 јуни.

Траеа нападите на Македонија и конечно погодивме во 87 минута кога Чурлинов му асистираше на Алиоски кој убаво со левата нога ја испрати топката во мрежата на Селс. Во судиското надополнување имаше шест минути уште да се игра, ги спречивме сите напади на Белгија и на крајот освоивме значаен бод.

Квалификации СП 2026

Национална арена „Тодор Проески“ – Скопје

Македонија – Белгија 1:1 (0:1)

Алиоски 87`/Де Кујпер 28`

Македонија: Димитриевски, Алиоски, Муслиу, Зајков, Илиевски (Ашковски 80`), Атанасов (Елези 46`), Стојчевски (Чурлинов 58`), Елмас, Барди, Костадинов (Митровски 80`), Миовски (М. Ристовски 85`).