Американката Емили Остин доживеала необична средба со Кики, женка – горила, во бостонската зоолошка градина „Френклин Парк“, а видеото кое го направил нејзиниот сопруг Мајкл, за многу кратко време стана „вирално“.

„Никогаш не сонував дека ќе доживеам такво нешто. Не гледаше од својата пештера и посака да го допре и погали рачето на нашиот петмесечен син Кенион“, рекла Емили и додала дека горилата Кики минала околу пет минути покрај заштитното стакло гледајќи во нејзиниот син.

Во еден момент горилата ја ставила раката на стаклото како да се обидува да го земе во раце малиот Кенион. Потоа го земала своето седумесечно младенче по име Пабло кое го кренала покрај стаклото гордо покажувајќи и го нејзиното бебе на Емили. Покрај Пабло, Кики е мајка на уште четири ќерки.

„Нејзиното лице беше полно со љубов. Кики ни го покажа своето младенче, малекиот Пабло“, изјавила воодушевено Емили и додала дека се надева дека ќе може повторно да ја посети зоолошката градина и да мине време со Кики и нејзиниот Пабло.