По цели 13 години верност и големи моменти за паметење, англискиот голгетер Џејми Варди денес официјално објави дека на крајот од сезоната ќе се раздели со Лестер Сити , клубот во кој стана икона, инспирација и симбол на невозможни соништа што стануваат реалност.

Варди, кој беше централна фигура во незаборавната шампионска сезона 2015/2016, одлучи дека е време да стави точка на својата приказна во дресот на „лисиците“. Со речиси 500 одиграни натпревари и речиси 200 погодоци, напаѓачот кој некогаш играше аматерски фудбал, си заминува како најголемата легенда во историјата на клубот.

„Мислам дека направив сè што можев. Не е лесно да се збогувам, но време е да тргнам понатаму“, изјави Варди, навестувајќи дека нема да се пензионира и дека разгледува понуди од странство, меѓу кои и од американската МЛС.

Goodbye to the GOAT 🐐 pic.twitter.com/romej28Kbr

— Leicester City (@LCFC) April 24, 2025

Лестер најави специјално испраќање на натпреварот против Саутемптон на 18 мај, кога публиката на „Кинг Пауер“ ќе му каже едно големо „благодариме“ на човекот кој им подари соништа.