На Шахтјор Доњецк му беше потребен триумф во Варшава за да се пласира во осминафиналето на Лигата на шампионите, но Украинците не успеаја и загубија убедливо во последното шесто коло од групата „Ф“. Екипата на Лајпциг е новиот учесник во нокаут-фазата откако убедливо со 0:4 славеше вечерва на стадионот во Полска.

Нкунку во 10 минута по асистенцијата на Вернер донесе предност за Германците, потоа на стартот од вториот дел позитивата ја зголеми Силва (50`). Нкунку на овој меч запиша и асистенција, во 62 минута му помогна на Шобошлаи да ја затресе мрежата на противникот за 0:3, а конечниот епилог беше поставен во 68 минута по автоголот на Бондар.

Во вториот дуел од истата група Реал Мадрид не го испушти првото место и на стадионот „Сантјаго Бернабеу“ со 5:1 го декласираше Селтик. Модриќ уште во шестата минута од пенал донесе предност за „кралевите“, во 21 минута исто така од белата точка постигнааа гол домаќините, а овојпат сигурен е Родриго. Во 35 минута Шкотите можеа да намалат од пенал, но непрецизен беше Јурановиќ.

Во 51 минута шпанскиот гигант стрелаше преку Асенсио (3:0), за нова радост за домашните навивачи се погрижи Винисиус Јуниор (61`), а асистентот на тој погодок Валверде ја комплетираше „петардата“ во 71 минута. Гостите само успеаја да го ублажат поразот преку Жота (84`).

На конечната табела во групата „Ф“ Реал заврши на врвот со 13 бодови, еден повеќе од Лајпциг, шест бодови освои Шахтјор кој ќе продолжи во Лигата на Европа, а на дното е Селтик со два бодови.