Премиерот Димитар Ковачевски при денешната посета на детската градинка „13 Ноември“, објект „Парк” во Општина Центар беше видно расположен и самиот со досетливи забелешки ја водеше прес конференцијата на која се обрати и министерката за труд и социјална политика Јованка Тренчевска и градоначалникот на Општина Центар Горан Герасимовски.

Прво ги организираше снимателите, потоа и говорниците на настанот па и редот за новинарски прашања, како што самиот рече како „конферансие“.

Прес конференција пред детската градинка по повод „Недела на детето”, во присуство и на други политичари, сопартијци и пратеници, се претвори редовно во маратонска, со одговарање на актуелни прашања за пензиите, затворите, уставните измени, додека децата повторно не се изгубија од фокусот како и при секоја посета на детските градинки во последниов период.

„За време на „Детската недела”, од 02 – 09 октомври, е предвидено да се издвојуваат средства од билети за театар, кино, уметничка изложба и културни манифестации; од продажба на поштенски марки во внатрешниот сообраќај, од билети за спортски натпревари и други спортски приредби; од секој продаден возен билет во железничкиот и автомобилскиот, меѓународниот, меѓуградскиот сообраќај и во авионскиот сообраќај; како и од секој продаден облик на електронски музички и видеозапис, видео касета и друго.
Сите овие средства ќе бидат наменети за активности посветени на децата“, рече премиерот  претставувајќи ја одлуката на Владата на Република Северна Македонија за издвојување средства за законски востановената „Детска недела”, којашто се реализира со цел афирмација на правата и заштитата на децата.