Шпанскиот тенисер Карлос Алкараз се пласираше во финалето на турнирот во „Квинс клуб“ во Лондон, Велика Британија, откако го победи својот сонародник Роберто Баутиста Агут со 2:0 во сетови 6:4 и 6:4 за еден час и 30 минути игра.

Шпанецот ја продолжи својата серија одлични резултати и стигна до финалето на петтиот турнир по ред.

Претходно, Алкараз до последниот меч доаѓаше во Монте Карло, Барселона, Рим, Ролан Гарос, а сега и во Лондон.

Во двата сета, по еден брејк беше доволен за Алкараз да победи и да стигне до мечот за пехарот.

Алкараз во финалето ќе игра против Јиржи Лехечка. Чешкиот тенисер го победи домашниот тенисер Џек Дрејпер во првото полуфинале со 6:4, 4:6 и 7:5 по два часа и девет минути игра.

Победникот на турнирот во Лондон ќе добие 471,755 евра, а поразениот финалист 253,790 евра.