Бранко Попоски не е обичен готвач и блогер за храна. Тој е скромен, љубезен и инспиративен човек, кој себеси би се опишал како – „креативна, инспиративна и комуникативна личност која сака да готви, да патува, да ужива во прошетки со пријатели, да учи, да осмислува креативни маркетинг стратегии и да зборува за своето родно место Вевчани и неговиот дом“.

Со неговиот ентузијазам и природен талент за приготвување вкусни јадења, Бранко ги води своите следбениците на кулинарско патешествие низ неговиот инстаграм блог.

На социјалните медиуми се појавува под псевдонимот „Cooking with Branko“ („Готвење со Бранко“), каде ги инспирира своите следбеници да направат вкусен и брзо приготвен оброк. Неговиот блог за храна е спој на љубов, бои и емоции, вклучувајќи речиси илјада рецепти.

Бранко повеќе од четири години пласира разновидна и богата содржина, која е широко прифатена кај македонската јавност. Неговата кулинарска приказна е создадена од љубов и за љубов кон храната и готвењето. Таа голема љубов ја наследил од неговите родители, кои секогаш го учеле дека сè што прави во животот треба да го прави со многу љубов.

„Решив дека морам да направам нешто што ќе ме задоволи мене, што ќе ми биде сатисфакција. Поминаа четири години од основањето на блогот. Тогаш немаше толку многу блогери за храна, па решив дека дека сите мои способности во кујната ќе ги искористам на еден поразличен и покреативен начин“, изјави тој за „Слободно со Агнеса“.

Што се однесува до содржината на неговиот блог, тој постојано се труди да ги задоволи потребите и барањата на неговите следбеници, како и да пласира рецепти кои не одземаат повеќе од петнаесетина минути, кои се приготвуваат со максимум пет намирници и се лесни за консумирање.

Медитеранската кујна е негова омилена кујна. Најмногу сака да подготвува паста, а не може да ѝ одолее на вевчанската кујна и питата на неговата мајка. Често знае да изненади и со некој традиционален македонски рецепт, кој за неполн час достигнува и дури до 300 допаѓања на социјалните медиуми.

„Домашната храна, храната на мојата мајка, е нешто што едвај чекам да го пробам кога ќе заминам во Вевчани. Без разлика дали е сукано, печено во сач, некое месо…сите тие работи ми се при срце“, вели Бранко.

Бранко веќе шест години работи во маркетинг индустријата. Знаењето и експертизата стекнати во маркетингот му овозможиле да создаде силен бренд и да ја зголеми препознатливоста на неговиот блог во конкурентниот пејзаж.

Тој продолжува да ги развива своите вештини во маркетинг индустријата и во овој момент е сконцентриран на изучување на нови работи поврзани со дигиталниот маркетинг и нивно вклучување во работењето.

„Самото образование ми помогна во градењето на ‘Готвење со Бранко’. Повеќе од шест години сум дел од маркетинг секторот и морам да кажам дека се пронајдов во оваа област. Мојот живот е во тие координати на маркетингот. Маркетингот ми помогна многу во самооткривањето. Не само на себеси, туку и на блогот ‘Готвење со Бранко’“, вели Бранко.

Во рамките на неговото портфолио, од основањето на блогот, па се до денес, Бранко вбројува неколку успешни проекти на кои е доста горд – хуманитарните настани и проекти, готвењето за поранешниот амбасадор на САД во Македонија – Џес Бејли, неговиот дводневниот настап на „Skopje Wine Salon“ во 2018 година, воведувањето на проектот интимни вечери со „Готвење со Бранко“ и готвење на најразлични теми (италијанска кујна, веганска кујна, македонска кујна, француска кујна и сл.), настапот на „Summerland“ во 2019 година, организирањето на хуманитарниот месец – „Месец на хуманост со ‘Готвење со Бранко’”, на којшто беа предизвикани 20 познати личности од македонската сцена и култура и беа приготвени повеќе од 1.500 оброци за социјално загрозените семејства преку проектот „Ретвитни оброк“ и здружението „Љубезност“, претставувањето на делото на „Готвење со Бранко“ во рамките на СОС Детско Село и уште многу други. Во ноември 2020 година, „Готвење со Бранко“ се закити и со титулата „Блогер за храна на годината“ од страна на публиката.

Бранко е пример за млад блогер за храна, кој со својата страст и ангажман го обогатува светот на готвењето. Неговата личност и автентичност во пристапот кон кулинарското искуство го прават одлична инспирација за сите кои сакаат да го истражуваат вкусот на животот.

Проследете го целото видео со Бранко: