Потребата за бесплатни оброци е значително зголемена за оние лица коишто не можат да обезбедат за себе, или за своите најблиски. Како иницијатива „Ретвитни оброк“ ја поттикнуваме хуманоста и солидарноста кај секој од нас и во услови кога имаме економски потешкотии во земјава но и голема стапка на сиромашни луѓе. Предизвик е да обезбедиме оброк за оние најранливите групи на граѓани кои немаат. Граѓанска должност е да се грижиме едни за други и се помагаме – вели Кристијан Калинов активист од иницијативата „Ретвитни оброк“ која секоја недела пред платото на Домот на АРМ во центарот на градот заедно со невладината организација „Љубезност“ дели бесплатни оброци за бездомни лица, социјално загрозени луѓе но и лица кои не можат да си дозволат еден оброк во тек на денот.

Калинов при гостувањето во емисијата „Утрински печат“ посочи дека иницијативата „Ретвитни оброк“ во април оваа година ќе наполни 8 години од постоењето а еланот на волонтерите за да се помогне на оној кој нема е ист како од првиот ден.

– Секоја недела пред платото на Домот на АРМ во центарот на градот обезбедуваме оброци за 300 до 350 лица коишто не можат да ги обезбедат за себе, или за своите најблски. За жал нашите капацитети се ограничени и не можеме да допринесеме да имаме повеќе оброци за гладните граѓани. Во исто време можам да кажам дека сум навистина благодарен што има огромен број на граѓани и фирми кои имаат свесност за оваа проблематика и кои сакаат да дадат свој придонес, но мислам дека потребите се над нашите сили за она што ние можеме да го пружиме како услуга. Овој проблем може да се надмине според мене, доколку направиме вмрежување на сите сили и капацитети но и институции каде што сите би допринеле оваа граѓанска хумана иницијатива се прошири и подобри – истакна Калинов.

Активистот од иницијативата „Ретвитни оброк“ посочи дека можеби немаат официјална информација за вкупен број на гладни луѓе во главниот град, но можат да се пофалат со голем број на волонтери од супер широка возрасна палета.

– Менито е одлично и нашето мото е да готвиме како за нас. Готвиме во просториите на Евангелско протестантската црква. Просториите се релативно мали и во импровизирана кујна се обидуваме да зготвиме со десетина до дванаесет волонтери храна во петоците и подоцна да ја поделиме за време на викендите. Се обидуваме да го „прошараме“ менито за да не стане здодевно и имаме многу креативни волонтери кои од истите состојки знаат да направат сосема различен оброк. Донациите од кетеринг службите но и општествено одговорните фирми само ја зголемуваат бројката на оброци кои ние подоцна ја делиме на граѓаните – вели Калинов.

Повеќе од разговорот со Кристијан Калинов активист од иницијативата „Ретвитни оброк“ погледнете во видеото во продолжение..