Возрасните луѓе со попреченост немаат премногу шанса за нормално функционирање во Македонија. Едно од ретките места каде тие би можеле да поминат неколку часа во денот и да бидат згрижени од стручни професионалци, но и од волентери, е центарот за окупациона терапија на ЦМА КРИК во Скопје.

– На мене ми е убаво во центарот, со сите се дружам и таму имаме секојдневни активности – вели Александар Василевски од Скопје, кој е корисник на бесплатните услуги на КРИК.

Со него во студиото на „Утрински печат“ беше и психологот Каја Милошевска, која смета дека институциите прават премалку за лицата со попреченост, особено за тие што се постари од 18 години.

– Окупациона терапија е терапија за сите возрасти. Се базира на три полиња, секојдневни активности кога ги обучуваме нашите корисници за лична хигиена, им даваме помош при учење и правилно користење на своето слободно време. Целиот тим на центарот и окупационите терапевти правиме посебен план за секој корисник посебно. Планираме како секој корисник да се развива во иднина, односно што сакаме да постигнеме, да подобриме и која е крајната цел на терапијата – вели Милошевска.

Центарот во кој се врши окупационата терапија е целосно зависен од донирани средства, а голема помош експертите и волонтерите на КРИК добиваат и од Општина Кисела Вода. Милошевска апелира до сите општини во Република Македонија да ја поддржат нивната работа и да отворат слични центри за грижа на лицата со попреченост.

Целото интервју со Каја Милошевска и Александар Василевски можете да го погледнете на следниот линк: