ВИДЕО: Институтот за демократија подготвува план за помош на населението во случај на кризна состојба
Не е кревање паника ако во училиштата се зачестат вежбите во случај на непогода, за да не се создаде паника и опасност од стампедо при обидот за евакуација. Исто така имаме нов број за повикување 112 кој треба да ги замени сите останати броеви и кој треба да го знаат сите граѓани, рече денеска во Утрински брифинг Миша Поповиќ, раководител на Центарот за добро управување и постар истражувач во Институт за демократија.
Препорачано
Институтот за демократија во соработка со осум општини (Конче, Карбинци, Велес, Кавадарци, Маврово-Ростуше, Гостивар), направи стратешки план за намалување на ризици од катастрофи. Тргнавме од претпоставка дека општините се тие кои први треба да одговорат доколку се случи некоја катастрофа, затоа што прво одат на терен локалните ресурси како противпожарна, јавни претпријатија, а дури потоа се вклучуваат институциите на централниот систем за да одговорат на некоја несреќа. Од друга страна сакаме акцентот да го ставиме на превенцијата, поради тоа што секој денар вложен во превенција се исплати бидејќи штетата кога ќе се случи, трошокот за санација е седум пати поголем, рече Поповиќ.
Тој нагласува дека овој план за намалување на последиците може да помогне и во случај на воена криза.
– Идејата за подготвеност може да помогне и во човечки предизвикани кризи, како воена состојба. Од опасност во природата до несреќа, разликата е човечка интервенција, односно не постои природна несреќа туку природна опасност. Така што при донесувањето на одлука каде општините ќе градат, треба да се размислува дека потребно е да изградиме отпорна општина. Бидејќи секогаш на удар се граѓаните, ние предлагаме општините да ја зголемат едукативната компонента, затоа што подготвени граѓани секогаш ќе претрпат помалку штета доколку нешто се случи. На пример, покрај упатување апел, општините можат да ги обележат местата на кои не смее да се прави скара, или да се едуцираат како да реагираат во случај на земјотрес и пожар. Ние подготвуваме прирачник за граѓаните кој ќе им биде даден на располагање, вели Поповиќ и нагласува дека често се заборава на ранливите групи, кои не се во можност самостојно да го напуштат местото на несреќата.
