Кошаркарите на Индијана пејсерс направија нов историски подвиг и по вторпат во својата историја ќе играат во големото НБА финале. Во шестиот натпревар од финалето на Источната конференција, Пејсерси го совладаа Њујорк никс со убедливи 125-108 и со тоа ја затворија серијата со 4-2. Како и во 2000 година, патот до големото финале го најдоа преку Њујорк.

Натпреварот во Индијанаполис започна со релативно израмнето темпо. Никс успеваа да држат чекор, но домаќините речиси постојано беа во водство. На полувреме се замина со скромна предност од четири поени за Индијана (58-54), но второто полувреме донесе сосема поинаква слика. Пејсерси го отворија со серија од 9-0 и првпат се одлепија на двоцифрена разлика.

Во продолжението, кошаркарите на Рик Карлајл не дозволија Њујорк да се врати во игра. Разликата постојано се движеше над десет поени, а во последната четвртина Никс целосно потклекнаа. Индијана стигна и до максимални +20, на радост на полната сала.

Најефикасен во победничкиот тим беше Паскал Сиакам со 31 поен, покажувајќи зошто беше едно од најзначајните засилувања сезонава. Одличен беше и Тајрис Халибартон со 21 поен, а солиден придонес дадоа и Топин (18), Нембхард (14), Брајант и Тарнер (по 11) и Несмит (10). Индијана имаше дури седум играчи со двоцифрен учинок.

Кај Њујорк, кој повторно не успеа да го пробие прагот до големото финале, најрасположен беше Ануноби со 24 поени.

Во борбата за шампионскиот прстен, Пејсерс ги очекува пресметка со младиот и талентиран тим на Оклахома Сити Тандер.