„Дрисла“ вечерва не го прима ѓубрето кое се собра во скопските општини во организација на градоначалниците на ВМРО-ДПМНЕ бидејќи акциите се организирале без таа да знае, потврди и градоначаникот на Аеродром Тимчо Муцунски кој заедно со другите скопски градоначалниците беа пред депонијата.

Вечерва градоначалниците од неколку скопски општини се самоорганизираа и со помош на механизација и камиони од други градови го собираа сметот во Аеродром, Кисела Вода, Гази Баба, Бутел и Ѓорче Петров.

На терен во Бутел излезе и лидерот на ВМРО-ДПМНЕ Христијан Мицкоски заедно со градоначалникот на оваа општина Дарко Костовски.

Во меѓувреме пред капијата на ЈП Комунална Хигиена, повторно излегоа на протест вработените, а дојде и директорката Косана Мазнева Николиќ да ги повика да се вратат да работат.

За вечерва итен состанок за ситуацијата со несобраното ѓубре од скопските улици најави и Кризниот штаб на Град Скопје.