Фудбалерите на Фулам и Манчестер јунајтед ремизираа 1:1 во одличен натпревар од второто коло од Премиер лигата одигран на „Кревин Котиџ“.

Јунајтед беше подобар во поголемиот дел од мечот. Гостите промашија пенал, потоа го постигнаа првиот гол, но упорниот Саша Лукиќ и неговите соиграчи од Фулам не им дозволија на „црвените ѓаволи“ да ги земат бодовите од неговиот стадион.

Во третата минута, голот на Фулам се тресеше по ударот на Куња. Бразилецот имаше уште една одлична можност во 14 минута, а овој пат домашниот голман Лено му се испречи на патот. Фулам чекаше до 17 минута за својата прва шанса кога Ивоби се обиде, а Баџиндер го одбрани ударот на поранешниот играч на Арсенал.

А потоа во 33 минута, дефанзивецот на Фулам, Баси Џудо, го фаулираше Маунт, по што на Јунајтед му беше досуден пенал, а капитенот на гостите, Бруно Фернандеш, ја испрати топката во „орбита“ од „белата точка“.

Сепак, гостите поведоа во 58 минута кога дефанзивецот Лени Жоро беше највисок на скокот по корнер, малку го турна својот директен ривал во скокот и шутираше со глава, а несреќниот напаѓач на Фулам, Муниз, ја одби топката во својот гол.

Избраниците на менаџерот Марко Силва успеаја да се наметнат на средината од теренот, каде што српскиот интернационалец Саша Лукиќ покажа добри перформанси, а наградата за тоа дојде во 73 минута кога резервниот играч Емил Смит-Роу го постигна израмнувачкиот гол од својот прв контакт со топката.