По повод Светскиот ден на планетата Земја беше промовирана првата иновативната мобилна апликација „Фри тејбл“ („FreeTable“) за онлајн резервации во скопските локали. Целта на апликацијата е намалување на фрлањето на храна од рестораните и подигање на свеста кај граѓаните, воведување иновативни практики за мерење и намалување на отпадот од храна во мали и средни претпријатија.

Марко Ангеловски, творец на мобилната апликација „FreeTable“ вели дека апликацијата е креирана со цел да се намали фрлањето храна преку подобро планирање на резервирани маси и да се зголеми ефикасноста на работењето на локалите, како и да ги поврзува корисниците со рестораните на брз и ефикасен начин.

Идејното решение за овој концепт беше изработено од извонреден тим на професионалци кои работеа десет месеци со посветеност и истражување на пазарот, со цел подигање на свеста кај граѓаните за биодиверзитетот и рециклирањето на веќе употребуваната храна.

-На самиот почеток кога започнав со работа на апликацијата, зборував со неколку локали за нивната заинтересираност за истата. Дел од нив ми дадоа добри предлози што може да се додаде и преработи за да се подобри. По имплементација на тие промени имавме многу подобар одзив. Поголемиот дел од рестораните, особено оние кои ги следат трендовите и користат некакви дигитални алатки, беа веднаш отворени и заинтересирани. Ги привлекуваше можноста за полесно менаџирање на резервациите и видливоста што апликацијата ја носи – вели Ангеловски.

Тој додаде дека кај некои традиционални локали имало одреден отпор на почетокот. Главно поради недоверба кон технологијата или страв дека ќе им се комплицира секојдневното работење.

-Корисникот влегува во апликацијата, си бира од голем број локали во Скопје што ги имаме, дали тоа се ресторани, барови, кафулиња… Влегува во локалот во кој ќе сака да резервира, внeсува датум, време, место за седење, број на луѓе, ја прави резервацијата, локалот потоа добива нотификација на својот мобилен уред, ја отвара неговата апликација, ги гледа сите непотврдени резервации и секоја резервација има можност да ја потврди, да ја одбие или пак да даде предлог за промена на време или место за седење на корисникот – објаснува Ангеловски.

Проектот „Taste the Waste“ е поддржан од Европската Унија, а е координиран од здружението „Го Грин“ – Скопје, во соработка со локалните партнери „Markt Organic“ и „Biokosmos“.

Претседателот на невладината организација „Биди зелен“ – „Go Green“, Блаже Јосифовски вели дека почнале пред 15 години, како младешки ентузијазам со желба што повеќе да научат.

Учевме за тоа што ќе значат климатските предизвици за нас и како нашето општество треба да се адаптира на новите промени, како ќе произведуваме храна, како ќе се произведува енергија, а како при тоа да живееме во чиста и здрава животна средина – вели Јосифовски.

Тимот на „Го Грин“ е отворен за соработка со цел проширување во цела Македонија.