Случајот на трагичната смрт на младата Фросина ја потресе Македонија. Трагедијата предизвика гневни и револтни реакции кај граѓаните коишто денес се собраа на протест. Бараа санкции за возачите кои ги прекршуваат сообраќајните правила.

Граѓаните носеа транспаренти со пораки за правда, а на местото на несреќата остава цвеќиња и свеќи во сеќавање на прерано починатата Фросина.

Трогната и загрижена мајка која протестираше заедно со нејзиното дете, ни објасни дека на улицата во која живее се случила несреќата.

-Мислам, нема што да се каже, тој е убиец, не станува збор за несреќа, затоа што ти да возиш 130 км во урбана населба, на ваков булевар, особено тука, кај што јас живеам одзади Симпо, знаете тука колку деца има, колку луѓе? Да биде овој случај последен, затоа што еве го и моето дете за некоја година, ќе сака само да излезе на улица.- објаснува мајката за „Слободен печат“

Во текот на протестот, присутните побараа одговорност и за судската одлука која го ослободила возачот од притвор за претходни прекршоци. Тие повикаа на радикални промени во судството и полицијата, како и поголеми контроли на сообраќајот за да се спречат вакви трагедии.

Фросина Кулакова, 22-годишна девојка од Скопје, го загуби животот на 29 јануари, кога беше прегазена на пешачки премин на булеварот „Партизански одреди“.

Возачот, 20-годишниот Васил Јованов, кој управувал со автомобилот под дејство на алкохол и без возачка дозвола, поминал на црвено светло и ја удрил Фросина, која набрзо починала на самото место.