Легендарниот англиски напаѓач Енди Кол беше дел од легендарната „златна“ генерација на Манчестер јунајтед која доминираше во Англија, но и Европа пред нешто повеќе од 20 години.

Постигна скоро 300 голови во кариерата, а сега објасни зошто никогаш не сакаше да изведува пенали. Севкупно во Премиер лигата запиша 414 настапи и постигна дури 187 голови, и се промовираше во еден најдобрите стрелци во историјата на најквалитетната англиска фудбалска лига.

Многумина сметаат дека неговите бројки ќе беа многу подобри и дека ќе беше многу блиску до Алан Ширер кој е најдобар стрелец на сите времиња со 260 голови во Премиер лигата (56 од белата точка), но Кол за разлика од поранешниот напаѓач на Њукасл не сакаше да шутира пенали.

– Мојот менталитет беше дека ако не можам да постигнам гол од игра, тогаш не сум доволно добар. Тоа е едноставно објаснување зошто не изведував пенали. Многу сум горд на рекордот што го имам и головите што ги постигнав. Гледам дека луѓето во последно време многу пишуваа дека оваа бројка ќе беше многу поголема доколку изведував пенали, но многу сум горд на она што го имам постигнато. Мислам дека тоа е исто така посебно достигнување да се постигнат толку голови без да се изведуваат пенали. Можете да ми кажете дека сум арогантен или не поради тоа, но јас бев таков. Тогаш го имав тој став за фудбалот и особено за напаѓачите. Головите од пенали не можат да покажат дали сте доволно добри, дека играте на врвно ниво. Головите од игра се тие што ја прават разликата – вели Кол.

За Манчестер јунајтед имаше 275 настапи и постигна 121 гол, во кариерата играше и за Нотингем форест, Арсенал, Бристол сити, Њукасл, Блекбурн, Фулам, Портсмут, Бирмингем, Сандерленд и Барнли. Во сезоната 1993/94 стана првиот играч во историјата на Премиер лигата кој постигнал над 30 гола во една сезона (34) без ниту еден од нив да дојде од белата точка. 20 години подоцна тоа го повтори Луис Суарез во дресот на Ливерпул.