Американската актерка Кортни Кокс, која доживеа светска слава со ликот Моника Гелер во серијата „Пријатели“ („Friends“), минатиот месец го прослави нејзиниот 60. роденден.

Сега Кокс им покажа на своите обожаватели како изгледа нејзината рутина за вежбање и како таа се грижи за својата одлична фигура.

„Само што го прославив роденденот. Не ми се допаѓа бројката, но немам избор“, вели таа во видеото, снимено во вежбална.

Пред да се снима како вежба, Кокс рече дека „само треба да дадеш сè од себе“, а рутината што им ја претстави на своите следбеници вклучува вежби со раце, чучњеви, влечење, вежби за гради, стомачни мускули и кардио.

Кокс носеше црн спортски градник и соодветни хеланки кои ја истакнаа нејзината завидна фигура.

Иако нејзиниот сет за вежбање е прилично стандарден, кон крајот на видеото, работите се променија. Актерката ја замени својата црна облека за вежбање со ситно бикини во иста боја додека се бореше со студот во поголемиот замрзнувач.

„Што, дали е ова криотерапија (терапија со мраз)?“, рече на шега таа излегувајќи од споменатиот замрзнувач.

Иако на јавноста не ѝ е познато дали Кокс тоа го прави секој ден, таа веќе објави видео на кое се обидува да влезе во „ледена бања“.

Иако е подготвена да ги испроба речиси сите трендови за да го задржи младешкиот изглед, актерката жали за филерите. Имено, во октомври 2023 година, Кокс за магазинот „Воман“ изјави дека ги отстранила и поправила сите филери бидејќи, како што тврди, „малку претерала“.

„Има толку голем притисок да се остане млад во оваа индустрија… Штом ќе почнеш, настанува домино ефект“, објасни таа.