За сите професионални успеси како концертен пијанист, наставник во ДМБУЦ „Илија Николовски Луј“, доктор на науки по естетика и нејзините спортски достигнувања како државен првак во велосипедизмот во „Утрински печат“, зборувавме со Дуња Иванова.

„Музиката сѐ уште ме дефинира како личност, се дружиме уште од моја шестгодишна возраст, кога се запишав во нижото музичко училиште, па потоа сите надградувања, средното училиште, Факултетот за музичка уметност и магистратурата. Она што за мене е прва љубов е пијаното, со кое секојдневно се дружам и до ден-денес, а со текот на годините успеав да го пронајдам сопствениот правец, сопствениот израз. Во последните 12 години исполнив голем број на солистички концерти, со уникатни репертоари, со премиерни изведби на претежно современи автори, што е реткост на македонската музичка сцена“, за својата љубов кон музиката и кариерата како концертен пијанист во „Утрински печат“ зборуваше Дуња Иванова.

„Важно е контактот со инструментот да биде на дневно ниво, макар и половина час, фокусирано внимание врз клавишите, врз материјата која во моментот ја работите, е сосема доволно. Кога бев студент или во средното училиште тоа беа од 5 до 8 часа во текот на денот, но сега за концерт се подготвувам дури и кога не сум покрај пијаното, ја читам партитурата, ментално се подготвувам, правам емоционален план за тоа како треба да звучи и изгледа концертот. Кога сето тоа е фокусирано и добро испланирано, секогаш има успех.“

За работата како наставник по пијано, во нижото музичко училиште во Скопје, Дуња вели дека ѝ е вистинско задоволство, иако има свои деца, таа учениците ги чувствува како свои, со неа споделуваат дел од своето секојдневие и таа со нив секојдневно расте.

„Она што ме загрижува во последно време, е тоа што децата се преоптоварени, доаѓаат изморени, гладни, одат на милион активности. Веројатно родителите не наоѓаат друг модус да се справат со ова брзо секојдневие. Сепак, она што е клучно е фокусот, колку децата денес се спремни да одвојат три до четири часа во текот на денот за да работат на пијаното. Би рекла дека е речиси невозможно за едно дете кое посетува часови по англиски, германски, оди на гимнастика, на балет и доаѓа на клавир, на солфеж. Ако децата навистина сакаат да се занимаваат со концертна дејност, треба единствено да бидат насочени кон музичкото училиште и да немаат дополнителни активности“, вели Дуња Иванова.

Дуња е три години по ред државен првак во велосипедизам, за што вели дека е предизвик на кој му се посветила со цело срце. Има огромна поддршка од луѓето од велосипедкиот клуб „Енерџи“, кои ѝ обезбедуваат совршени услови за тренинг и за напредок. Сега се подготвува за еден историси подвиг, за првпат во историјата на македонскиот велосипедизам, женски претставник ќе настапи на светското првенство кое ќе се одржи во Глазгов, оваа година во август.

За сето ова и многу повеќе од разговорот со Дуња Иванова, на следниот линк: