Репрезентацијата на Португалија го освои четвртото издание на Лигата на нации на УЕФА, откако во драматичен финиш по пенали ја совлада Шпанија со 5-3. По регуларните 90 минути и дополнителните 30, резултатот беше 2-2, а херој на пенал-рулетот беше голманот Диого Коста.

Шпанците двапати водеа во првото полувреме, благодарение на прецизните удари на Зубименди и Ојарзабал, двајца фудбалери на Реал Сосиедад кои донесоа надеж за „Црвената фурија“. Но, Португалија не се предаваше, Нуно Мендес најпрво израмни, а потоа и Кристијано Роналдо го изедначи резултатот пред самиот крај на полувремето.

Иако Шпанија имаше иницијатива и повеќе шанси, не успеа да ја материјализира предноста. Португалците беа максимално ефикасни, два шута, два гола. Темпото драстично опадна во второто полувреме, а проблем за Португалците беше и повредата на Роналдо кој мораше да го напушти теренот во 88. минута.

Сепак, и покрај очекувањата дека Шпанија ќе ја искористи неговата отсутност, продолженијата поминаа без значителни закани пред двата гола.

Клучниот момент дојде во пенал-серијата. Осум од деветте удари беа прецизни, единствен кој не успеа да погоди беше Алваро Мората, кој влезе во 111. минута токму за изведување пенал, но неговиот обид беше прочитан и одбранет од Коста.

Со ова, Португалија ја освои својата втора титула во Лигата на нации, израмнувајќи се со Франција, додека Шпанија остана на една.