Денвер Нагетс се на чекор до пласман во втората рунда од НБА плејофот, откако изутринава убедливо го совлада Лос Анџелес клиперс со 131-115 и поведе со 3-2 во серијата.

По двете тесни победи, Нагетси одиграа моќен натпревар во кој доминираа речиси од самиот старт. Веќе по првата четвртина имаа предност од 12 поени, а иако Клиперс се доближија на -8 до полувремето, домашниот тим повторно го подигна нивото на игра во вториот дел. Со неверојатна прецизност од далечина, Денвер стигна и до +24, што беше недостижно за гостите.

Клиперс накратко се доближија до девет поени негатива, но Ерон Гордон и Џамал Мареј брзо ја вратија контролата. Токму Мареј беше човекот на вечерта, извонреден со 43 поени , 7 асистенции и 5 скока. Српскиот центар Никола Јокиќ не беше прецизен во шутот (4/13 од поле), но повторно блесна со својот универзален придонес, 13 поени, 12 асистенции и 10 скока за нов трипл-дабл.

Кај Клиперс, најрасположен беше Ивица Зубац со 27 поени, но неговиот ангажман не беше доволен да го спречи поразот.

Денвер сега има предност и мирен пристап кон шестиот натпревар, во кој ќе се обиде да ја затвори серијата и да го избегне евентуалниот седми меч. Победникот од оваа пресметка во втората рунда ќе се соочи со Оклахома Сити тандер, кои веќе го елиминираа Мемфис во четири натпревари.

РЕЗУЛТАТИ
Индијана – Милвоки 119-118 (4-1)
Њујорк – Детроит 103-106 (3-2)
Бостон – Орландо 120-89 (4-1)
Денвер – ЛА Клиперс 131-115 (3-2)