Кошаркарите на Црвена звезда остварија голема победа во 18 коло од Евролигата, откако славеа на гостувањето кај Фенербахче со резултат 85:76.

Турците подобро го отворија натпреварот, после првата четвртина беше 26:18 за гигантот од Истанбул.

До паузата српската екипа успеа да се консолидира, а во втората четвртина му дозволи само девет поени на противникот.

Фенербахче по првите 20 минути имаше само минимална позитива од 35:34, а по третата четвртина на семафорот стоеше нерешени 57:57.

Во последната делница гостите беа подобри, одиграа одлични 10 минути и на крајот дојдоа до победата, прва за нив надвор од Белград.

Најзаслужен за победата на „црвено-белите“ беше Боломбој со 24 поени, следен од Гиедраитис со 19. На спротивната страна Американецот Хејнс беше најрасположен со 21 поен, девет скокови и една асистенција.

Во следното коло, веќе за два дена, Фенер повторно ќе биде домаќин и ќе го пречека Макаби Тел Авив, додека Црвена звезда во големото српско дерби ќе се сретне против Партизан.