„Движењето пешкир“ се повеќе добива на масовност во Грција и се шири во местата каде грчките граѓани сфатија дека закупци на плажите окупирале премногу од јавниот простор, блокирајќи им пристап до плажите и морскиот брег, надвор од сите постоечки законски прописи, а на терен веќе неколку дена се инспекторите на Службата за недвижности заедно со полицајци и други државни службеници и првите „победи“ за движењето станаа факт.

На Парос, барот и ресторан „Ародо“ на плажа во Криос, откако го посетија инспектори и беше соодветно казнет за нива прекршоци во врска со плажата, вчера ги извести своите клиенти дека на неодредено време ја прекинува својата дејност.

Инаку првата победа на „Движењето пешкир“ беше забележана минатата недела, на 2 август на Парос каде плажата Микри Санта Марија беше ослободена од лежалките и чадорите на закупец кој практично ја имаше затворено целата плажа, а по интервенцијата собра поголем дел од лежалките што ги постави на плажата.

Претходно имаше поплаки од Граѓанското движење на Парос за слободни плажи (познато и како „Движење пешкир“) за навредливи постапки од страна на бизнисмени, телохранители, незамисливи цени кои достигнаа 120 евра, по што следуваше реакција на грчката владата која преку надлежното Министерство за финансии соопшти дека никому нема да дозволи самоволие и дека почнуваат со проверки на сите плажи.

На Крф од контролите извршени во Контогјалос и Глифада, со учество на генералниот секретар за јавен имот Наја Колија, идентификувани се пет бизниси (4 во Контогјалос и еден во Глифада) кои незаконски окупирале области на морскиот брег, поради што им се изречени соодветните казни.

Во Контогјалос, исто така, за уште пет бизниси е утврдено дека прописно ги поставиле лежалките на плажите. Исто така, нивниот бизнис со поморски рекреативни пловила и спортови на вода бил легален.

Нелегалните бизниси во Контогјалос до утре 9 август добија рок да ги отстранат чадорите и лежалките, а надлежните им препорачаа на менаџерите на локалите сами да ги отстранат.

Што се однесува до Глифада, Крф, се очекува административен акт и санкции да бидат донесени до четврток, 10 август.

Во меѓувреме, како што соопшти грчката полиција „во трите дена од 4 до 6 август 2023 година на Киклади и Јонските острови, од страна на локални полициски служби уапсени се 16 лица – сопственици/одговорни/законски застапници на локали за кои е констатирано дека ги прекршиле одредбите за користење на плажата“.

Поточно, прекршоците поврзани со зафаќање на плажа со чадори без дозвола од надлежен орган, пречекорување на дозволата со зафаќање дополнителен простор од доделениот, користење на простор кој потпаѓа под заштитните одредби на археологијата и попречување на пристап до море со поставување на чадори на растојание помало од 5м. од крајбрежјето.

Апсења имало и на Миконос: уапсен е деловен менаџер кој поставил 26 комплети чадори на плажа на површина од 300 м2. без валидна лиценца, управителот на продавница за здрава храна кој поставил комплет чадори на површина од 300 метри квадратни без валидна лиценца, управителот на дуќан бидејќи поставил 133 комплети чадори на плажа на површина од 1.100 м2 што ја надминува за 600 м2 дозволата за користење на плажа како и деловен менаџер кој поставил 65 комплети чадори на површина од 1000 м2, дрвен под 80 м2., со 2 места за складирање производи и други работи за кои воопшто немал соодветна лиценца.

Во Сирос уапсен е сопственик на локал кој го користел морскиот брег над 10 м2. од соодветната дозвола, додека дополнително имал поставено 7 комплети чадор-лежалки на растојание помало од 5 метри од крајбрежјето со што се оневозможува бесплатен јавен пристап до морето, привремено е задржан управителот на друг локал кој поставил 10 комплети чадори на растојание помало од 5 метри од крајбрежјето, а уапсен е сопственикот на бар кој користел над 10 м2 од морскиот брег без соодветната дозвола, додека дополнително имал поставено 10 комплети чадори на растојание помало од 5 метри од крајбрежјето со што го блокирал јавниот пристап до морето.

Грчката полиција детално соопшти и на кои други места и острови апселе поради непочувањето на добиените лиценци. Грчката телевизија ЕРТ јави и за апсење на три лица на Закинтос, двајца бизнисмени и еден одговорен за соодветен број барови на плажа, по извршените проверките на плажата Лаганас во неделата кои поставиле од 30 до 60 чадори и лежжалки повеќе од дозволеното.

На Крф е уапсен управителот на локал бидејќи поставил 10 комплети чадори без дозвола, а во Кефалонија, друг сопственик на продавница за здрава храна бидејќи поставил 15 комплети чадори без дозвола.

Во меѓувреме грчките граѓани продолжуваат со демонстрации на Халкидики додека во Фаласарна, Крит кое е заштитено подрачје на мрежата „Натура 2000“, лежалките покриваат речиси 80% од плажата, пренесува ЕРТ.

„Сега е време бизнисмените кои не се придржуваат или чие однесување е неприфатливо за граѓаните, а во соработка со Службата за недвижности, да не можат следната година, барем до две години, да изнајмуваат плажа. Сите видовме, но можеби не му го дадовме значењето што треба да го има на тоа што јасно се заобиколуваа условите за изнајмување на брегот и плажата“, рече Кипарисис Дебла, градоначалник на Ситонија. Верувам дека од сета оваа мобилизација само позитивни резултати и заклучоци, додаде тој.

Грчкиот министер за финансии и економија Костис Хаџидакис уште еднаш повтори дека Владата нема да им попушти концесионерите кои не се придржуваа до договорите со државата за плажите.

„Постојат договори меѓу државата и концесионерите во однос на плажите и давање услуги од нивна страна на плажите. Она на што се жалбите и што е констатирано со контролите што се спроведуваат во последните неколку дена, барем на Парос, е дека не се почитуваат условите од договорите. Прашањето е јасно од страна на државата, ќе се почитува законитоста“, нагласи министерот, говорејќи во вестите на СКАИ, минатата среда навечер.

И појасни: „Ќе го оспориме легитимитетот на овие концесионери, како што и претходно кажав, бидејќи прво, не е можно да ги толерираме да не го почитуваат она што самите го потпишале, второ, незамисливо е да се толерира нешто што доаѓа на сметка на туристичкиот производ на земјата и трето, нешто што е надвор од одредбите на законот не може да се толерира“.

Прашањето за ослободувањето на јавните плажи влезе и во грчкиот парламент каде партијата СИРИЗА го постави пред министрите за за финансии, внатрешни работи и за цивилна заштита.

Се споменува, во пратеничкото прашање, дека владата на СИРИЗА во 2019 година предвидела низа прописи за одбрана на јавниот пристап до морскиот брег како и транспарнтност во постапката на доделување концесии преку електронските аукции, како и забрана за закуп на 60% од целата плажа која треба да биде бесплатна.

Пратениците на СИРИЗА посочуваат дека владата на Нова Демократија го срушила овој режим, реорганизирајќи ја рамката во корист на приватниците, без да обезбеди почитување на оваа проширена рамка.