Британската разузнавачка служба МИ6 лансира свој наменски портал на „темната мрежа“ (Dark Web) со надеж дека ќе привлече нови шпиони преку интернет, особено од Русија, објави Би-би-си.

Безбедната платформа за пораки „Silent Courier“ има за цел да ја зајакне националната безбедност со тоа што ќе ѝ го олесни регрутирањето на разузнавачката агенција, соопшти Министерството за надворешни работи.

Потенцијалните агенти во Русија и низ целиот свет ќе бидат цел на Велика Британија, додава Министерството.

Се очекува објавата да биде потврдена во говор во Истанбул од страна на шефот на МИ-6 во заминување, Сер Ричард Мур, во петок наутро.

МИ6 е основана во 1909 година. Официјално е признаена во 1990-тите. Традиционално работела во сенка. Јавно е именуван само нејзиниот раководител, познат како „Си“ (C).

Агенцијата, која објави и видео за своите нови услуги, вели дека досега, суштината на нејзиното работење била средби лице в лице. Сепак, ќе се префрли на анонимноста на „дарк веб“, која често ја користат трговци со дрога, терористи и криминалци. Упатствата за тоа како да се користи новиот портал ќе бидат објавени на јутјуб-каналот на МИ6, објави Министерството за надворешни работи на Велика Британија.

Инвестирање во најсовремена технологија

„Како што светот се менува, а заканите со кои се соочуваме се зголемуваат, мора да се осигураме дека Велика Британија останува еден чекор пред своите противници“, изјави министерката за надворешни работи Ивет Купер, додавајќи дека се засилуваат напорите за регрутирање на најсовремени шпиони.

Најавата доаѓа еден месец пред Мур да се повлече по пет години на функцијата. Тој ќе биде заменет од Блез Метревели, која ќе стане првата жена шеф на МИ6.