До неодамна најбогатиот човек на светот, извршниот директор на Твитер, Илон Маск во насловните страници на светските медиуми, но и секојдневните разговори на луѓето во изминативе години се појавува како личност која се наоѓа во центарот на вниманието. Фокусот често паѓа на него, пред многу од светските лидери и политичари.

Маск (51) е бизнисмен од Преторија, еден од главните градови на Јужноафриканската Република, кој доаѓа од богато семејство. Неговата мајка, Маје Маск, е познат канадски модел и диететичар, која често се појавувала на насловните страници на најпознатите светски магазини. Неговиот татко, Ерол Маск, е познат електромашински инженер, пилот, морнар, консултант и развивач на имот, а бил и полу-сопственик на замбиски рудник во близина на езерото Тангањика. Илон Маск има помлад брат, Кимбал и помлада сестра Тоска. Откако неговите родители се развеле во 1980 година, тој одлучил поголем дел од времето да живее со неговиот татко.

Како дете, велат дека Маск бил срамежливо и интровертно дете. Иако од самото негово детство тој уживал огромно богатство, тој уште од млади години имал сериозни амбиции. Дипломирал на Универзитетот во Пенсилванија, а потоа започнал да работи во неколку компании.

Но, неговиот подем во последниве години, посебно со подемот на компанијата „Тесла“, каде тој има голем дел од акциите на таа компанија, иако во последниов период беше принуден да продаде голем број од нив.

Со доаѓањето на чело на „Твитер“, една од најголемите социјални мрежи, неговата популарност „експлодираше“. Иако познат по неговите контроверзни мислења и изјави, за многумина Илон Маск е генијалец кој има одличен план за иднината на човештвото. Тој има голем удел и во „Спејс-Икс“, приватна вселенска компанија која развива свои ракети и има за план да испрати луѓе на Месечината.

Но, таквите амбициозни планови на Маск, по доаѓањето на чело на Твитер, за момент запреа. Целиот негов фокус сега е на Твитер. „Војната“ која тој ја започна против ботовите на таа социјална мрежа, како и борбата за слободата на говор се најактуелните теми со кои тој и тимот на „Твитер“ се занимава.

Маск неодамна спроведе анкета на социјалната мрежа во која праша дали луѓето сакаат од него да се повлече од функцијата извршен директор на „Твитер“, по што луѓето се изјаснија дека се „за“ таквата одлука, но Маск рече дека е отворен за понуди од луѓе кои сакаат да ја купат платформата, само неколку недели откако тој дојде на таа функција.

Контроверзна беше и анкетата околу враќањето на профилот на поранешниот претседател на САД, Доналд Трамп, за која иако беше изгласано во негова корист, поранешниот лидер на американските републиканци ја одби поканата да се врати на „Твитер“.

Кој ќе го наследи и дали воопшто ќе има нов директор на „Твитер“, како и до каде ќе биде границата во популарноста на Маск, останува да видиме.