Велшката пејачка Дафи, позната по светскиот хит „Mercy“, се врати во центарот на вниманието откако на платформата ТикТок се појави видео во кое таа ја пее својата најпозната песна. Оваа ненадејна објава изненади и воодушеви многу нејзини обожаватели, бидејќи пејачката веќе една деценија беше отсутна од јавниот живот.

На снимката, Дафи, чие вистинско име е Ејми Ен Дафи, емотивно ги изведува стиховите на „Mercy“, што поттикна шпекулации дека можеби најавува нова музичка соработка или ремикс на хитот.

Фановите брзо ја преплавија платформата со коментари на радост и поддршка. „Конечно се врати!“, „Ми недостасуваше!“, „Дафи е неверојатна пејачка“, се дел од реакциите на нејзините следбеници.

@emotion.hq Some of you asked if Duffy was really doing a UK Garage remix with us… #duffy #newmusic #ElectronicMusic #ukgarage #dancemusic #remix ♬ Mercy UK Garage Remix – exoglidemusic

Пејачката се повлече од јавноста во 2011 година, а нејзиното исчезнување предизвика бројни шпекулации. Дури во 2020 година, Дафи јавно проговори за причините зад нејзиното отсуство, откривајќи дека била жртва на киднапирање и силување.

Според нејзиното сведоштво, таа била дрогирана во ресторан, а потоа одведена во непозната земја, каде што поминала низ тешки трауми. По враќањето, останала затворена во својот дом, плашејќи се да побара помош, уверена дека нејзиниот напаѓач би можел да ја пронајде.

„Силувањето е како да живееш, а всушност да си мртов. Ми требаше долго време да ги составам сите скршени делови од себе“, напиша таа во потресна објава на Инстаграм, која подоцна ја избриша.

Поради траумите што ги доживеала, Дафи не само што ја прекина својата музичка кариера, туку се дистанцираше и од најблиските. Во неколку наврати изјави дека доживеала моменти на страв за својот живот и дека дури размислувала за бегство од местото каде што била заробена.

Да потсетиме, кариерата на Дафи започна блескаво во 2007 година со хитот „Rockferry“, а нејзиниот прв албум се продаде во повеќе од 9 милиони примероци ширум светот. Покрај тоа, освои престижни награди, меѓу кои и Британската музичка награда и Греми за најдобар поп вокален албум.

По успехот, во 2011 година одлучи да се повлече од музиката и се посвети на актерството, но подоцна целосно исчезна од јавната сцена.

По потресната исповед дека била киднапирана и силувана, Дафи се врати со нова песна (ВИДЕО)