Барселона вечерва триумфираше над Ваљадолид со резултат 2:1 во 34 коло од најсилното шпанско фудбалско првенство.

Водеше Ваљадолид со голот на Санчез во шестата минута, но Барселона направи пресврт во второто полувреме со погодоците на Рафиња во 54 и Лопез во 60 минута.

Тоа беше осми пораз во низа за Ваљадолид, вкупно 19-ти во последните 20 натпревари, а од претходно е потврдено дека испаѓа во понизок ранг.

Каталонскиот гигант од друга страна освои три важни бодови во трката за титулата, па сега има „плус седум“ во однос на второпласираниот Реал Мадрид кој својот меч од оваа рунда ќе го има в недела дома против Селта Виго.

Во 35 коло на Ла Лига, Барселона на 11 мај ќе го пречека Реал, а во меѓувреме го очекува реванш од полуфиналето во Лигата на шампионите против Интер.

Во другите денешни мечеви: Алавес – Атлетико Мадрид 0:0, Виљареал – Осасуна 4:2 и Лас Палмас – Валенсија 2:3.