Фудбалерите на Барселона обезбедија пласман во финалето на Копа дел Реј, откако го елиминираа Атлетико Мадрид.

По спектакуларното реми 4:4 во првиот натпревар на Камп Ноу, Барса минимално славеше во Мадрид, а херој на мечот беше Феран Торес. Тој е во фантастична форма, бидејќи ова е негов петти гол на последните четири натпревари.

Барселона доминираше и го имаше поседот на топката, што дополнително ги фрустрира домашните, кои на полувремето имаа четири жолти картони.

Единствениот гол беше постигнат во 27 минута, кога Торес ја искористи одличната асистенција на Ламине Јамал ​​и погоди со првиот допир на топката, оставајќи го Облак немоќен.

Атлетико се обидуваше да се врати во натпреварот, постигна гол преку Серлот, но истиот беше поништен поради офсајд.

Барселона во финалето на Кралскиот куп ќе се соочи против Реал Мадрид на 26 април во Севиља.