Фудбалерите на Астон Вила го победија Фулам на домашен терен со резултат од 1:0, во натпреварот од 35 коло во Премиер лигата.

Екипата на Унаи Емери го постигна решавачкиот гол денеска во 12 минута. Мекгин центрираше од корнер од десната страна, а Тилеманс со глава ја испрати топката во мрежата од осум метри.

На овој начин, клубот од Бирмингем остана во неизвесна борба за место во Лигата на шампионите.

Првите пет екипи од Премиер лигата ќе играат во елитното европско натпреварување следната сезона, а Вила сега е седма со 60 освоени бодови.

Шестопласираниот Нотингем форест и петтопласираниот Челси имаат ист број бодови, четвртопласираниот Њукасл има два бода повеќе, додека третопласираниот Манчестер сити има четири бодови предност.

Треба да се напомене дека Астон Вила и Сити имаат повеќе натпревари од конкурентите. Фулам сега е осми на табелата со 51 бод.