Арсенал го победи Манчестер јунајтед со 3:1 (1:1) во дербито од четвртото коло во Премиер лигата.

Фантастичниот ритам на игра го видовме во првите 45 минути на „Емирати“. Арсенал имаше иницијатива, Јунајтед се бранеше и чекаше контра. Гостите од Манчестер ги чекаа дефанзивците на „топчиите“ да му остават простор на Маркус Рашфрод. Ериксен му испрати одлична топка во просторот, а Рашфорд си остави простор со два дриблинзи и потоа од 15-16 метри го погоди далечниот агол.

Само што тргнаа од центарот, фудбалерите на Арсенал израмнија. И тоа за 45 секунди. Мартинели извонредно го забележа Едегард, по што следеше повратна топка и неодбранлив удар на Норвежанецот. Домаќините напаѓаа до крајот на првиот дел, но Сака, Мартинели и Хаверц не успеаја да го матираат Онана.

Арсенал напаѓаше и во вториот дел, но Манчестер ја имаше првата голема шанса. Повторно Рашфорд се најде во одлична можност, но Рамсдејл успеа да го одбрани неговиот удар од седум-осум метри.

Неколку минути подоцна Каи Хаверц влезе во шеснаесетникот, Ван Бисака беше невнимателен врз поранешниот играч на Челси. Судијата Тејлор прво досуди пенал, а потоа погледна во ВАР и ја поништи својата одлука. Имаше контакт, но недоволно за да се покаже на белата точка.

Голема радост во финишот за Арсенал обезбедија Едегард во 97 минута и Габриел Жезус во 101 минута.

Се одиграа уште два меча во неделата, Кристал палас со 3:2 триумфираше над Вулверхемптон, додека Ливерпул со 3:0 дома ја надигра Астон Вила.