Илјадници луѓе вчера попладне на протестен марш во Скопје побараа правда за 22-годишната Фросина Кулакова која пред неколку дена смртно беше прегазена на булеварот „Партизански одреди“ во Скопје, во близина на Универзалната сала.

Протестот кој започна на „Партизански одреди“ продолжи кон Собранието и Кривичниот суд каде се одржа триминутен молк.

– Протестите се оправдани и поддржани од поголемиот дел од нашите граѓани и насочени се кон нефункционирањето на системот, кој за едни е мајка, а за други маќеа. Денеска продолжува судењето за Вања и Панче, каде првообвинетиот исто така со години на еден волшебен начин ја избегува правдата за други дела, па на крајот тоа заврши со трагедија. Така е и во случајот со младата Фросина, бидејќи момчето што ја прегази уште лани требало да биде осудено на затворска казна поради продажба на наркотици. Но, на него му било прогледано низ прсти и тој добил поинаков третман. Затоа велам, гневот на демонстрантите е оправдан. Тоа што е интересно е дека членовите на семејството на загинатата, апелираа да не се политизираат протестите, а голем број на приврзаници на владејачката партија започнаа негативно да се изразуваат за луѓето што демонстрираат незадоволство. Точно е дека некои работи од протестите во Скопје се слични со протестите во Белград и тоа можеби е врската која на некои луѓе им пречи – вели новинарот на Слободен печат, Срѓан Ивановиќ.