Поранешниот директор на Службата за општи и заеднички работи на Владата (СОЗР), Пеце Мирчески, вчера беше приведен на испрашување во полицијата по што беше поднесено обвинение против него.

– Мирчески се товари за четири кривични дела, првото и најбитно е за примање поткуп, фалсификување службена исправа, проневера во службата и несовесно работење во службата, извршени додека раководел со СОЗР. Постојат докази дека лажно се пријавувани лица кои се претставиле како новинари, за што СОЗР плаќал патувања во странство. Тука ќе биде интересно да се види дали патувањата биле можеби фиктивни. Исто така многу интересен детал од обвинението е тоа што компанијата ВИП сервис купила возило од СОЗР, а истото возило потоа Мирчески го возел за приватни потреби. Секако треба да се сочека со судскиот процес и до тогаш на Мирчески мора да му се почитува презумпцијата на невиност, бидејќи сето тоа што беше кажано од обвинителство треба да се докаже пред суд – вели новинарот на Слободен печат, Срѓан Ивановиќ.