Првата група од 21 шпански активист – вклучувајќи ја и поранешната градоначалничка на Барселона, Ада Колау – од 49-те кои беа на бродовите од флотилата што носеа помош за Појасот Газа, но беа пресретнати минатата недела од израелските вооружени сили, пристигна со авион на аеродромот во Мадрид во неделата, а членовите на групата нагласија дека претрпеле малтретирање и понижување за време на притворањето, објави агенцијата ЕФЕ.

„Физичкото и психолошкото малтретирање се повторуваше секојдневно. Нѐ тепаа, нѐ влечеа. Ни ги врзаа очите. Ни ги врзаа рацете и нозете“, изјави за новинарите Рафаел Борего, член на флотата.

Шпанскиот министер за надворешни работи, Хозе Мануел Алварез, вчера наутро објави дека е постигнат договор со Израел, така што првата група од 21 шпански активист ќе може да се врати по воздушен пат во текот на денот.

Сите се согласија да потпишат документ со кој потврдуваат дека влегле нелегално во Израел, рече Алварез.

Останатите 28 досега одбија да го сторат тоа и се очекува да останат во притвор подолго, истакна каталонскиот европратеник и адвокат Хауме Азенс на шпанската јавна телевизија.

Според португалското Министерство за надворешни работи, се очекуваше и четворица португалски активисти да пристигнат во Лисабон синоќа.

Дел од флотилата отплови од Барселона на почетокот на септември, со цел да ја пробие израелската блокада на Појасот Газа и да достави хуманитарна помош до палестинската енклава. Но, минатата недела беше пресретнат од израелската морнарица.

Меѓу членовите на флотата, активисти од десетици земји, беше и младата Швеѓанка Грета Тунберг и разни политички личности,

Стотици активисти кои биле на бродовите на флотилата и биле приведени од израелските вооружени сили чекаат депортација. Веќе 137 активисти беа префрлени со хеликоптер во Истанбул во саботата.

Шпанија е меѓу најкритичните гласови во Европа во врска со војната што Израел ја води во Појасот Газа.

Грета Тунберг во ќелија со бубачки