Издавачот „Бункер“, во рамките на едицијата „Апсолутни почетници“, издаде нов графички роман со наслов „Лоу – Берлинските години на Дејвид Боуви“ од германскиот автор и цртач Рајнхард Клајст.

Графичкиот роман со наслов „Лоу – Берлинските години на Дејвид Боуви“, всушност, се надоврзува на првиот дел „Стармен – Годините на Дејвид Боуви како Зиги Стардаст“ кое „Бункер“ веќе го објави и со него Клајст на импресивен начин ја заокружува дводелната биографија на Дејвид Боуви, истовремено креирајќи вибрантен портрет на Берлин од минатиот век.

Во 1976 година поп-ѕвездата Дејвид Боуви е на врвот. Меѓутоа славата, ексцесите, паранојата и прекумерната употреба на дроги се закануваат повторно да го фрлат во прегратките на бездната. Тој повлекува драстичен потег. Заедно со својот музички пријател Иги Поп го менува лудилото на Градот на ангелите – Лос Анџелес за Берлин.

И токму во поделениот Берлин, каде што секоја прошетка на крајот завршува со ѕид, тој повторно ќе ги пронајде мирот, креативноста и инспирацијата за наредните албуми: „Low“, „Heroes“ и „Lodger“, кои ја сочинуваат култната „Берлинска трилогија“. Со нив Дејвид Боуви ќе го потврди статусот на водечка светска музичка ѕвезда.

– Стрипот изобилува со низа интересни анегдоти во кои се појавуваат некои од најхаризматичните претставници на поп/рок културата кои ги обележаа седумдесеттите и осумдесеттите години на минатиот век: Џон Ленон, Иги Поп, Лутер Вандрос, Брајан Ино, Марк Болан… Исто така, делото ни ја открива и пулсирачката музичка сцена во Германија од тој период со „Крафтверк“, „Тенџерин дрим“, „Кен“, „Ној“, „Кластер“… кои се само некои од имињата кои Боуви многу ги почитувал и кои извршиле големо влијание врз неговото понатамошно музичко формирање – објаснува Владимир Битољану од „Бункер“.

Рајнхард Клајст работеше повеќе години на дводелната биографија на Дејвид Боуви и може да се каже дека таа претставува круна на неговата досегашна кариера. Долгоочекуваната светска премиера на „Лоу – Берлинските години на Дејвид Боуви“ беше кон крајот на минатата година, а исто како и во случајот со „Стармен“, „Бункер“ меѓу првите во светот ги откупи правата и го објави ова извонредно дело на македонски јазик.

Рајнхард Клајст е реномиран германски стрип-автор. Преведуван е на повеќе јазици, а неговите дела освоиле некои од најпрестижните награди. Графичкиот роман „Cash, I see a darkness“ (биографија на уште една музичка икона Џони Кеш), на пример, е номиниран за двете најпрестижни американски стрип-награди „Ајзнер“ и „Харви“.

Истото дело, како и графичкиот роман „Боксерот“ беа прогласени за најдобар стрип на германски јазик во годините на нивното објавување. За „Боксерот“, Клајст, како прв домашен стрип-автор, ја доби Германската награда за литература за млади. „Бункер“, исто така, го има објавено и неговиот графички роман „Олимписки сон – Приказната на Самија Јусуф Омар“, кој ја освои наградата за мир Густав-Хајнеман.

Треба да се одбележи и дека Рајхард Клајст во јуни годинава беше гостин на фестивалот „Стрип трип“ во Скопје, кој е организиран од страна на МКЦ и група стрип-ентузијасти, меѓу кои е и издавачот „Бункер“. Неговото гостување беше овозможено од страна на Гете-институтот во Скопје.

Објавувањето на графичкиот роман „Лоу“ го поддржа Министерството за култура и туризам. Преводот од германски јазик е на Марија Чорбева Пеновска, лектурата на Милена Стојановска, а предговорот го напиша Игор Анѓелков. Дизајнот, типографијата и подготовката за печат се на Ласко Џуровски, Тотем д.с. Издавачот „Бункер“ веќе речиси 15 години ја поседува првата специјализирана книжарница за стрипови кај нас.

(Текстот е објавен во „Културен печат“ број 299, во печатеното издание на весникот „Слободен печат“ на 20-21.9.2025)