Вежбањето Tаи чи чуан може да ги забави симптомите на Паркинсоновата болест
Една нова кинеска студија вели дека древната боречка вештина Таи чи чуан може да помогне во забавување на симптомите на Паркинсоновата болест за неколку години, пишува „Би-би-си“.
Препорачано
Истражувачите во новата студија велат дека оние кои ја вежбале боречката вештина двапати неделно имале помалку компликации и подобар квалитет на живот од оние кои воопшто не ја практикувале.
Се вели дека наодите од новата студија ги поткрепуваат претходните студии за придобивките од вежбањето за лицата со Паркинсонова болест.
Научниците од Медицинскиот факултет на Универзитетот во Шангај, го следеле здравјето на стотици пациенти со Паркинсонова болест во период од пет години. Една група од 147 луѓе ја вежбале древната вештина таи чи чуан, додека другата група од 187 не вежбале.
Традиционалната кинеска вежба комбинира бавни, нежни движења со длабоко дишење и релаксација. Добротворната организација во Велика Британија ја опишува оваа древна вештина како физичка активност со низок интензитет што може „да помогне да го подигне вашето расположение и да помогне да живеете добро“.
Истражувачите откриле дека болеста напредувала побавно кај лицата кои биле во таи чи групата при мерењата на симптомите, движењето и рамнотежата.
Оваа група, исто така, забележала помалку паѓања, помалку болки во грбот и вртоглавица, помалку проблеми со меморијата и концентрацијата, отколку во другата група. Во исто време, спиењето и квалитетот на животот постојано се подобрувал.
Претходното испитување на лица со Паркинсонова болест кои вежбале таи чи шест месеци покажало поголеми подобрувања во одење, држење и рамнотежа од оние кои не биле на програмата.
Пишувајќи во списанието за неврологија, неврохирургија и психијатрија, д-р Ген Ли и коавторите велат дека нивната студија покажува „дека таи чи чуан го задржува долгорочниот корисен ефект врз Паркинсоновата болест“.
Тие додаваат дека вежбањето таи чи чуан може да се користи за долгорочно справување со Паркинсоновата болест и за продолжување на квалитетот на животот, а исто така помага да се задржат пациентите активни.
Но, тие признаваат дека студијата е релативно мала и не може да докаже дека оваа боречка вештина е исклучиво причината за позитивните исходи што ги доживеа едната група на пациенти.
