Никој не го познава домашното милениче, како неговиот сопственик, па веројатно ќе ги знае знаците дека нешто не е во ред со нивното кученце. Сепак, од големо значење е доколку навреме забележите дека вашето куче не се чувствува добро, пишува „Њусвик“.

Ветеринарката д-р Линда Сајмон, ги сподели трите клучни знаци, на кои секој сопственик треба да внимава. Можеби вашето куче не си игра со својата омилена играчка или не ги следи своите вообичаени навики во текот на денот.

„Кучињата можат да покажат суптилни знаци кога не се чувствуваат добро, така што сопствениците треба да внимаваат на какви било промени во однесувањето. Некои од почестите работи што би можеле да ги видиме вклучуваат недостаток на енергија, недостаток на апетит и повеќе спиење“, изјави Сајмон.

Недостаток на енергија и незаинтересираност

Како што вели ветеринарката, првиот знак на кој сопствениците треба да внимаваат е дали нивното куче има недостаток на енергија. Ова може да значи општа летаргија, но може да се покаже и преку недостаток на интерес за работи кои обично ги прават среќни.

„Тие дури може да изгледаат депресивно и бавно. Не постои одредено време или крајна точка, бидејќи кучето може да биде летаргично само за краток период, 12 часа или повеќе, ако има благи стомачни тегоби. Меѓутоа, хронично медицинско прашање кое не се лекува, како артритис или дијабетес може да значи постојана летаргија“, вели таа.

Но, само затоа што вашето куче одеднаш има помалку енергија од нормалното или помалку го привлекуваат играчките, не мора секогаш да ве загрижува. Во некои случаи, тоа може да биде нешто моментално, како на пример, да се уморни од долгата прошетка или можеби се мачат на жештината.

Губење на апетит или повраќање

Не е тајна дека кучињата можат да јадат речиси сè што е им на повидок, па кога ќе забележите дека нивниот сад за храна едвај е допрен и дека не бараат дополнителни закуски, обично е знак дека не се чувствуваат добро.

Прескокнувањето на еден или два оброка нема драстично да влијае на кучето, па ветеринарката Сајмон вели дека сопствениците  не треба да бидат премногу загрижени кога првпат ќе го забележат овој знак.

„Недостигот на апетит може, но и не мора да се појави заедно со повраќање. За некои кучиња гадењето значи дека не сакаат да јадат или дека им се повраќа. Но, понекогаш гледам кучиња кои повраќаат, а тоа не им влијае врз нивниот апетит“, додала таа.

Колку долго кучето може да издржи без јадење зависи од многу работи, вклучително и дали пие, дали повраќа или има дијареа, каква големина е, и на која возраст е.

Мало кученце треба да јаде на неколку часа или може да дехидрира и да развие низок шеќер во крвта. Сепак, возрасно куче од голема раса може да помине неколку дена без јадење и сепак да изгледа релативно нормално.

Доколку сте загрижени, нејзиниот совет е да му понудите на вашето куче варено пилешко и ориз, па ако тоа успешно го изедат, тогаш тоа е позитивен знак.

Потребен им е многу повеќе сон од вообичаено

Можеби мислите дека не е можно вашето куче да спие повеќе отколку што веќе тоа го прави секој ден, но кога не е добро, тоа би можело да биде еден од знаците.

Исто како и луѓето, кога кучето се чувствува лошо, тие ќе се обидат да закрепнат така што ќе отспијат и ќе му дозволат на телото да се одмори.

Како што вели ветеринарката, мрзеливото и поспано куче не треба секогаш да биде причина за загриженост, бидејќи тоа може да биде и резултат на топлото време или возраста на кучето.

Постарите кучиња природно ќе спијат повеќе, па тоа може да биде само знак дека нивната возраст ги достигнува.