Во дебатната емисија на телевизија „Клан“, на која се дебатираше за укинувањето на „балансерот“, како и за правичната застапеност на етничките заедници при вработувањата, гостуваше пратеникот од ВМРО-ДПМНЕ, Александар Велјановски.

Тој ја истакна важноста на правичната застапеност на сите етнички заедници при вработувањата во државата, но напомена дека балансерот како калкулатор за пресметување на идните вработени во однос на припадноста „веќе ја има одиграно својата улога и тој треба да се замени“.

„Во последните години видовме дека балансерот како калкулатор почна да се злоупотребува од страна на институциите, носител на тие злоупотреби беше господинот Артан Груби во неговото министерство, во кое знаеме дека имаше огромен број на вработени токму по овој основ“, вели Велјановски.

Според него, со ваквата алатка граѓаните биле доведени во ситуација да се определуваат дека не се Македонци, Албанци, Роми, Турци и така натаму, за да можат да дојдат до работно место во државната администрација.

„Стратегијата за реформа во јавната администрација, која беше поддржана од ДУИ, во себе го содржеше токму укинувањето на „балансерот“, а исто така и препораките на ЕК се во насока дека „балансерот“ се злоупотребува како алатка“, потсетува Велјановски.

Тој рече дека веќе е формирана работна група која треба да изработи предлог-закон, а притоа ќе ги земе предвид мислењата од стручната јавност преку една јавна дебата.

„Формирана е работа група која треба да работи на предлог-закон во кој ќе биде вклучена стручната јавност преку јавна расправа и сите општествени чинители, за да се добие едно добро законско решение. После ќе побараме и мислење од Венецијанската комисија во однос на законските решенија, за да не се судриме со Уставниот суд, дури потоа ќе влеземе во постапка за да донесеме едно ново законско решение со кое ќе бидат задоволени не само етничките заедници, туку и останатите ранливи категории во општеството“, појаснува Велјановски.