„Вардариште“ го труе Скопје, граѓаните молат за спас од депонијата
Поранешната депонија „Вардариште“ летово повеќепати гореше зачадувајќи ги Аеродром и Гази Баба и загрозувајќи го здравјето на граѓаните кои живеат во тој дел. Жителите се жалеа на неподносливата смрдеа на воздухот, бараат да се казнат сторителите што палат на старата депонија и бараат конечно да се најде решение за „Вардариште“.
Препорачано
Последниот пожар се случи неодамна, кој неизгаснат до крај, чадеше и ја загадуваше околината уште два дена потоа. Депонијата гореше и минатиот месец, по што тимови составени од униформирана полиција, инспектори од ЕВР при СВР Скопје и инспектори од инспекторатот на Oпштина Гази Баба извршуваа вонредни патроли во и околу дивата депонија „Вардариште“.
Градоначалникот на Општина Гази Баба, Бобан Стефковски тогаш соопшти дека ги задолжил општинските инспектори да продолжат да работи во две смени со зголемување на работното време во втората смена до 22 часот и притоа задолжително во текот на работното време и во втората смена да вршат надзор на дивата депонија „Вардариште“. Како што најави, требаше да биде испратено барање и до Град Скопје за да се активира градскиот инспекторат со редовно дежурство на депонијата.
Но, Град Скопје очигледно не работи во летниов период, а никаде ја нема ни градоначалничката Данела Арсовска да ги слушне апелите на граѓаните кои живеат во околината на „Вардариште“ и секојдневно се трујат од пожарите на ѓубриштето. Токму таа на почетокот на годината се пофали дека започнува чистење на старата депонија и дека ќе ја претвори во парк. Сега дури не се труди ни да објасни што се случи со тој проект и дали постои некакво решение за проблемот со кој се соочува цело Скопје, а особено Гази Баба и Аеродром.
По пожарот кој се случи повторно пред неколку дена повторно се огласи градоначалникот на Гази Баба, потсетувајќи ги граѓаните, кои од него бараат помош, дека Општината нема директна надлежност врз депонијата, туку надлежноста е на Градот Скопје. Тој посочи дека бил во постојана комуникација и со Бригадата за противпожарна заштита на град Скопје и со Центарот за управување со кризи, а на терен биле и неговите соработници, инспекторите од секторот за инспекциски работи, полицијата и пожарникарите.
Заедничката реакција на Општината и Министерството за внатрешни работи по однос на пожарите на депонијата од минатиот пат по моите информации имаат резултат во кој има лица осомничени за палењето – вели Стефковски.
Според него Општина Гази Баба стои целосно на располагање сега и веднаш да направи сѐ што е потребно за да се најде решение за овој децениски проблем. Притоа, тој ги информираше дека е постигнат договор со Министерството за транспорт и врски да се изработат и останатите два урбанистички планови за депонијата „Вардариште“ и дека очекува во најскоро време да бидат усвоени.
Ги задолжив службите да се разгледаат сите можности за согласно Законот да поведеме постапки за непостапување на Градот Скопје за решавање на овој проблем кој го доведува во прашање здравјето и животот на граѓаните – нагласи градоначалникот.
Граѓаните пак, воопшто не ги интересира кој е надлежен за „Вардариште“, тие само бараат да се најде еднаш засекогаш решение за овој голем загадувач. Притоа, го потсетуваат дека низ целата општина има диви депонии, кои иако се чистат, за кратко време повторно се создаваат. Затоа, прашуваат каде се општинските инспекторите за животна средина да преземат поригорозни мерки и да се санкционираат несовесните граѓани.
Има и комунален инспектор и комунални редари кој одат на терен во две смени. Има казни, има опомени. Ќе ги задолжам да направат извештај и ви давам збор дека следната недела јавно ќе објавам колку глоби и колку опомени се напишани. Но, се надевам дека ќе се согласите со мене дека инспекцијата не може да напише толку казни, колку што несовесни граѓани можат да фрлат смет – одговори Стефковски на забелешките на граѓаните во Фејсбук групата „Ѕид на Општина Гази Баба“.
Инспектори и полицајци ќе „ловат“ потпалувачи на отпад во Гази Баба
За „Вардариште“, депонијата која официјално е затворена повеќе од две децении, но сепак е проблематична, пред 10 години по нарачка на Град Скопје е направена Физибилити студија каде е утврдено дека депонијата е полна со тешки метали, а дека се придутни и токсични гасови. Изработувачите на Студијата уште тогаш предупредуваа можното формирање експлозивна смеса и запалување на депонијата и апелираа за итна санација. И по деесет години оттогаш, ништо не е променето.
И не е палењето на „Вардариште“ единствената локација каде редовно се потпалува, но секако е една од најцрните еко-точки во градот. На палење, чад и смрдеа редовно реагираат и жителите на Карпош. Потпалувачите на жици и гуми „работат“ и преку Вардар, накај Визбегово и во Ѓорче. Со години за нив, исто така, надлежните не можат да најдат решение и да го спречат загадувањето на средината предизвикано од грст потпалувачи.
