По Велигден, Министерството за правда ги очекува првите предлози за измени и дополнувања на Законот за здруженија и фондации, а работната група што за таа цел е веќе формирана, ќе расправа и за историските личности, велат од Министерството за правда по реакциите за регистрацијата на Здружението и отворањето на културниот клуб со исто име „Ванчо Михајлов“ во Битола.

Министерството нема да донесе посебен закон ниту регистар на историски личности, бидејќи смета дека постојната правна рамка е доволна за да се одлучи за забрана на упис или забрана за дејствување.

– На 26 април очекуваме граѓанските организации и здруженија да достават предлози до работната група за измени и дополнувања на Законот за здруженија и фондации. Целта на Законот е подобрување на правната рамка во делот на одредбите што се однесуваат на статусот на организацијата од јавен интерес, регистрација на граѓански организации, дефинирање статус на непрофитни организации, како и начинот на нивно финансирање. Во рамките на работната група ќе се разгледува и прашањето за уредување на сите отворени прашања, меѓу кои и прашањето за историски личности – велат од Министерството за правда.

Министерството засега не размислува да донесе посебен закон за забранети личности, ниту таков регистар. Ова може да се заклучи од одговорот што „Слободен печат“ го доби на прашањето дали Министерството ќе изготви регистар и од кој период ќе бидат опфатени личностите.

– Постојната правна рамка, со внимателно повикување на судската практика на Европскиот суд за човекови права (ЕСЧП), е доволна за надлежните институции, ако се доведе во прашање називот на организацијата со одредена контроверзна историска личност, да ги следат и оценат суштински како програмските документи, така и дејствата на организацијата и нејзините членови пред да донесат каква било одлука за забрана на упис или забрана за дејствување – велат од Министерството.

Закон, регистар или комисија што ќе решава дали по некој историски лик може да се именува здружение, фондација, институција веќе побараа поранешна министерка за правда, ексамбасадори, аналитичари, професори и историчари.

– Важен е ликот на Ванчо Михајлов, но ние немаме закон за забранети имиња. Секоја држава има таков закон, а ние немаме. Самото отворање на бугарскиот културен центар „Ванчо Михајлов“ беше една голема провокација – изјави Мухамем Халили, претседател на Советот на амбасадори за ТВ21.

Професорот по уставно право Јове Кекеновски во „Утрински брифинг“ праша зошто се дозволило регистрација на здружение со името на најголемиот негатор на македонизмот.

– Оваа материја треба да се регулира. Ние од 1991 година до денес не успеавме да донесеме закон со кој ќе се оневозможи да се промовираат личности кои промовираат антимакедонизам, и истовремено да ја осудиме нивната фашистичка дејност. Правото треба на сите да им овозможи да ги уживаат своите права, а тоа треба и странците да го почитуваат – вели Кекеновски.

Тој додава дека и во демократија не е оневозможено да се цензурира или регулира нешто што не е општествено прифатливо.

– Државите по војната донесоа закони со кои се штитат од промовирање на фашизмот. Казните во Германија, на пример, се огромни. Во Австрија државата ја откупи куќата на Хитлер за да не се развива политички туризам. Нашата држава можеше навреме да го спречи регистрирањето на установи со името на овој најголем негатор на македонската посебност. Регистер на имиња и симболи има и Германија, ама тоа не значи дека може сѐ да биде опфатено. Се остава на свеста на администрацијата и вработените да реагираат соодветно. Ако некој службеник не знае кој е Ванчо Михајлов, можеле да прашаат во Институт за национална историја. Не е оправдување да се дозволи регистрација на здружение што го носи ова име – вели Кекеновски.

Нема предмет ни во Обвинителство ни во Уставен

Јавното обвинителство ги следи сите информации поврзани со регистрацијата на наведеното здружение и ако утврди дека се прекршени законските одредби, ќе постапи по своите законски надлежности, ни одговорија од Обвинителството на прашањето дали правосудните органи ќе поведат постапка за поништување на регистрацијата на Здружението „Ванчо Михајлов“.

Од Уставниот суд велат дека во моментов немаат предмет за дејствувањето на „Ванчо Михајлов“.

– Да, судот може да постапува самоиницијативно, но засега нема таква одлука – ни рекоа од Уставниот суд.